Gastu di estudio pa yu
Solamente gastu di estudio puru ta bini na remarke pa dedukshon. E dedukshon ta limitá te ku USD 5.587 pa yu. Pa un pagadó di impuesto ku ta kasá e dedukshon ta USD 11.174 pa yu. Bou di “gastu di estudio puru” ta komprondé e gastunan pa plaka di skol òf kolegio i buki i otro material obligatorio pa lès. Gastunan relatá na kompra di kòmpiuter, printer, aparato di zonido, instrumento di muzik i tal ta eksplísitamente ekskluí di dedukshon.
Bou di e gastunan dedusibel tambe ta kai e gastunan ku e mayor a karga anualmente pa pasashi di ida i buelta pa e yu ku ta studia den eksterior.
Paga tinu! Bo por bini na remarke pa dedukshon si bo por proba ku bo yu no ta risibí finansiamentu di estudio òf ta risibí un parti di finansiamentu di estudio i ku bo a paga e gastunan di estudio òf un parti di e gastunan di estudio ku mester konsiderá.
Den e kaso ku bo yu ta risibí finansiamentu di estudio kompleto tambe bo por bini na remarke pa dedukshon si bo por proba ku e finansiamentu di estudio no ta sufisiente pa kubri e gastunan di estudio kompletamente i ku bo mes a paga un parti di esaki.
Studia otro kaminda
Pa e studiante ku ta sigui su estudio na por ehèmpel Merka òf otro kaminda mester entregá e pruebanan ofisial di inskripshon di skol, spesifikashon di e plaka di kolegio i e lista di buki di e aña di estudio konserní, huntu ku e pruebanan di pago korespondiente. Pues, di tur manera mester warda e dokumentonan aki.
Paga tinu! Solamente e siguiente gastunan ta dedusibel komo gastu di estudio:
- plaka di skol òf kolegio;
- buki;
- material di lès obligatorio;
- un pasashi di buelo pa yu pa aña.
Paga tinu! Na petishon mester entregá e siguiente dokumentonan di prueba: un karta òf formulario di Informatie Beheer Groep (Grupo di Maneho di Informashon) na Groningen pa un yu ku ta studia na Hulanda òf Hulanda Karibense, den kua ta indiká kua estudio e yu ta sigui i e finansiamentu di estudio ku e yu a risibí. Òf un formulario I-20 pa un yu ku ta studia na Merka i un deklarashon di e instansha di finansiamentu di estudio ku ta proba kuantu finansiamentu di estudio e yu a risibí. Tambe mester inkluí e prueba di inskripshon di e instituto di enseñansa pa yu di 16 aña òf mas.
Ademas na petishon mester manda e dokumentonan di prueba i un spesifikashon di e gastunan hasí.