Gastu ekstraordinario
Bou di gastu ekstraordinario ta komprondé gastu pa:
- Sustento di yu di 27 aña pariba, pariente yegá i yu malu òf desabilitá te ku 26 aña;
- Malesa, parto, invalides i morto;
- Kurso òf estudio pa un profeshon di bo mes òf di bo kasá;
- Gastu di estudio di yu te ku 26 aña ku ta hasiendo un estudio MBO, HBO, universitario òf un estudio komparabel.
Paga tinu!
Serka hende kasá semper ta pone e gastunan ekstraordinario huntu. E gastunan ekstraordinario di e kasá ku e entrada personal mas abou ta atribuí na e kasá ku e entrada personal mas haltu.
E kasá ku e entrada personal mas haltu por dedusí e gastunan aki. Pa kalkulashon di e límite bo mester tene na kuenta e entrada kolektivo di abo i bo kasá na kuenta.
Gastunan pa sustento
E gastunan pa sustento nesesario di e siguiente parientenan di bo mes i/òf di bo kasá por dedusí:
- Yunan i yunan di kriansa di 27 aña pariba;
- Kasánan di e yunan aki;
- Mayornan (tambe mayornan di kriansa) i welanan;
- Ruman (i ruman di mama/tata) i nan kasá.
E gastunan pa sustento di e parientenan aki por dedusí ora e personanan aki no ta kapas pa sostené nan mes. E dedukshon ta limitá te ku
USD 1.397 pa kada persona ku sustento. Si por ehèmpel abo ta sostené bo mama i tata, e suma máksimo ku por dedusí ta 2 bia USD 1.397 òf USD 2.794. Ademas, e suma total ku bo por dedusí ta maksimalisá. Bo por dedusí maksimalmente 10% di bo entrada personal komo gastu pa sustento.
Gastu pa e sustento nesesario di yunan te ku 26 aña ku pa motibu di malesa òf desabilidat no ta kapas pa sostené nan mes, por kita sin dedusí e limitashon menshoná ariba.
Gastu pa kua bo tin derecho riba un kompensashon di por ehèmpel bo dunadó di trabou, agensia di seguro òf fondo di sustento bo no por dedusí, tampoko nò ora bo risibí e kompensashon ei te den un aña mas lat.
Gastu pa malesa, invalides, parto i morto
Gastu pa malesa, invalides, parto i morto di bo mes, bo kasá, yunan di bo mes òf di bo kasá i yunan di kriansa i di bo pariente di sanger òf pariente den e liña direkto (por ehèmpel welanan, mayornan i ñetunan) òf den e di dos grado di e suseshon den kolateral (por ehèmpel ruman hòmber i ruman muhé) por dedusí.
Ta trata por ehèmpel di:
- Prima di seguro kontra malesa;
- Gastu di dòkter, dentista, hospitalisashon;
- Remedi;
- Kontribushon na asosiashon di krus (kruisverenigingen);
- Brel i lente di kontakto;
- Gastu di entiero (prima pa fondo di entiero por kita solamente si na ora di morto no ta risibí un prima finansiero).
Gastu di buèltu den outo en konekshon ku malesa i gastu semehante (den esaki pensa por ehèmpel na un bishita di dòkter) por dedusí te ku sierto límite. Ora bo hasi uso di bo mes outo bo por dedusí te ku un suma di USD 0,20 pa kada kilometer. Si bo hasi uso di outo di un otro hende bo por dedusí gastu di gasolin.
Paga tinu!
Bo por kita solamente e parti di e gastunan di sustento, gastu pa malesa, invalides, parto i morto ku ta mas haltu ku un suma mínimo spesífiko (e límite).
Por dedusí e gastunan aki ora huntu nan ta suma mas ku 5% di e entrada personal ku un mínimo di USD 838. Pa kalkulashon di e altura di e límite pa hende kasá ta tene kuenta ku e entrada personal kolektivo di tur dos kasá.