Almasenamentu produkto suheto na akseins
Ora importá produkto suheto na akseins na Boneiru, Saba òf Sint Eustatius, mesora ta surgi un deber pa paga akseins. Pero por suspendé e deber aki ora, despues di importashon di e merkansia, hiba nan na un lugá pa almasená produkto suheto na akseins (AGP). Pa esaki ta usa un dokumento spesial (un vervoersopdracht, enkargo pa transporte). E ABB (Algemene Bestedingsbelasting, impuesto general di konsumo) sí mester paga for di ora di importashon.
Uitslag (despacho) di merkansia almasená den un AGP
Ora ku e merkansia suheto na akseins bai laga e AGP (e lugá di almasenamentu), ku destino pa uso den e pais (e término legal pa esaki ta uitslag), e ora ei ta surgi e deber pa paga akseins. Aki ta konta meskos ku ora di importashon, esta ku na Boneiru e uitslag di tur produkto suheto na akseins ta kargá ku un akseins. Pa Saba i Sint Eustatius ta konta ku únikamente e uitslag di gasolin ta suheto na akseins.
Den algun kaso ora di uitslag un dispensashon di akseins por ta aplikabel. E eksonerashonnan di akseins ta inkorporá den kapítulo IV, Título 5, di e Douane en accijnswet BES (Lei di Duana i Akseins BES).
Ora hiba merkansia almasená den un AGP na por ehèmpel:
- un depósito di duana (destinashon duana eksportashon);
- un depósito di merkansia i servisio (HDE/ destinashon duana eksportashon);
- un AGP pa e mesun tipo di merkansia;
- un lugá pafó di e isla kaminda nan ta (destinashon duana eksportashon),
e ora ei no ta konsiderá esaki komo uitslag (despacho) i no tin deber pa paga akseins.