Eksportashon

Kua ta e variantenan ora di eksportá merkansia?

Ora di eksportá merkansia e siguiente variantenan ta presente:

• eksportashon definitivo;
  • eksportashon standart;
  • eksportashon bou di krédito òf ku pago bèk di akseins.
• eksportashon temporal;
  • eksportashon temporal normal;
  •  passieve veredeling (perfekshonamentu pasivo).

Den e parti aki ta splika e diferente variantenan serka e destinashon di duana eksportashon.
Paga tinu: Pa tur variante di eksportashon ta konta ku bo mester informá bo mes adelantá si e eksportashon di bo merkansia ta posibel. Pasobra ta posibel ku e eksportashon ta prohibí òf ku tin sierto limitashon. Ehèmpel: pa eksportashon di merkansia stratégiko bo mester di un pèrmit di e Minister di Asuntunan Ekonómiko.

a. Eksportashon definitivo

a1. eksportashon standart
Ta papia di un eksportashon definitivo ora merkansia ta destiná pa hiba pa eksterior i no ta bin Hulanda Karibense bèk.

a2. eksportashon bou di krédito òf ku pago bèk di akseins eksportashon bou di krédito di akseins
Ora merkansia ta depositá den un lugá pa merkansia suheto na akseins (AGP) i ta eksportá nan, no ta debe akseins. Pa proba ku di berdat a eksportá e merkansia tambe, e portador di pèrmit AGP mester tin un deklarashon di eksportashon. Duana Hulanda Karibense mester a pone un firma bou di e deklarashon di eksportashon aki.

Eksportashon ku pago bèk di akseins

Akseins ta un impuesto di konsumo. Ora a paga e akseins kaba na Boneiru, Saba òf Sint Eustatius pero ta eksportá e merkansia suheto na akseins en kestion, den sierto situashon por duna bèk e akseins pagá na e eksportador di e merkansia. Pa proba ku di berdat a eksportá e merkansia tambe, e eksportador mester tin un deklarashon di eksportashon. Bou di e deklarashon di eksportashon aki mester tin un firma di Duana Hulanda Karibense.

E eksportador:

• ta redaktá un petishon por eskrito;
• ta aneksá e deklarashon di eksportashon ku firma di duana;
• ta pidi bèk e akseins serka e tim Servisio na kliente di Duana Hulanda Karibense.

Puntra e tim aki pa e kondishonnan pa pago bèk (wak datonan bou di Kontakto).

NB. Un pago bèk di akseins na Saba òf Sint Eustatius solamente por ta relashoná ku gasolin eksportá. Pasobra na e islanan aki no ta debe akseins riba merkansia i pues no ta pag’é tampoko.

b. Eksportashon temporal

b1. eksportashon temporal normal

Tin bia ta nesesario pa eksportá merkansia temporalmente, por ehèmpel pa us’é pa organisá un demostrashon den eksterior. Despues di un temporada e merkansia ta bolbe bèk den e mesun forma, sin kambio. Ora trese e merkansia bèk por haña dispensashon di impuesto general di konsumo (ABB) i akseins. Pues bo no ta paga impuesto di importashon ora di importá di nobo.

Paga tinu: e dispensashon di impuesto di importashon ta konta pa teritorio insular.
Ehèmpel: ta eksportá merkansia for di e merkado liber di Sint Eustatius temporalmente pa Sint Maarten. Despues di un temporada kòrtiku nan ta bolbe Sint Eustatius. No mester paga impuesto di importashon. Ora importá e merkansia na Saba despues di e uso na Sint Maarten, sí mester paga impuesto di importashon.

Kondishonnan ora di eksportashon temporal:

• ora di e eksportashon Duana Hulanda Karibense lo mester determiná identidat di e merkansia. Ta nifiká ku nan ta fiha sierto karakterístika di identifikashon di e merkansia riba e deklarashon di eksportashon. Dor di esaki por establesé ora e merkansia bolbe ku ta trata di mesun merkansia;
• re-importashon di e merkansia mester tuma lugá denter di 3 luna despues di e fecha di eksportashon;
• ora di re-importá solamente ta duna e dispensashon ora mustra e prueba di orígen di Boneiru, Saba òf Sint Eustatius na Duana. E prueba aki ta e deklarashon pa eksportashon riba papel riba kua Duana ora di eksportashon a nota e karakterístikanan di identifikashon.
• durante nan estadia pafó di e isla e merkansia no por risibí ningun tratamentu. Un eksepshon ta konta pa tratamentunan ku tabata nesesario pa tene e merkansia den bon estado.

Mi mester di un pèrmit di e inspektor di Duana Hulanda Karibense pa por eksportá merkansia temporalmente?

Nò, ora bo sigui e prosedimentu manera a deskribié promé ku esaki, pa e forma di eksportashon temporal aki no mester di un pèrmit di e inspektor. Kòrda sí ku ora di eksportashon Duana por establesé e identidat di e merkansia (wak bou di ‘kondishonnan’).

b2. passieve veredeling (perfekshonamentu pasivo)
Ehèmpelnan di passieve veredeling:

• bo ta biba na Boneiru i bo ke eksportá e outo ku bo tin einan temporalmente pa Korsou pa laga nan spùit e di nobo aya;
• bo tin un mashin na Saba ku no ta funshoná bon i p’esei ta laga nan hib’é Sint Maarten kaminda nan ta chèk e mashin i drech’é. Despues e mashin ta bini Saba bèk.

Passieve veredeling (perfekshonamentu pasivo) pues ta un forma di eksportashon temporal unda ta duna e merkansia un sierto tratamentu pafó di e isla di eksportashon. E tratamentunan aki por ta:

• adaptá merkansia, inkluso montage, de-ensamblage i adaptashon di esei na otro merkansia;
• elaborashon di merkansia;
• drechamentu di merkansia, inkluso revishon i ahuste di merkansia.

Despues di e adaptashon, elaborashon òf drechamentu, ora e merkansia regresá na e isla di eksportashon, por otorgá dispensashon parsial di impuesto di importashon.

Paga tinu: meskos ku ora di eksportashon temporal normal, ora di re-importashon di e merkansia ta konta ku tin dispensashon di impuesto di importashon únikamente ora e re-importashon tuma lugá riba e isla for di kua a eksportá e merkansia.

Pa aplikashon di e areglo passieve veredeling (perfekshonamentu pasivo) mi mester di un pèrmit di e inspektor di Duana Hulanda Karibense?

Sí, bo mester di un pèrmit. Mester a otorgá e pèrmit promé ku e eksportashon di e merkansia. E pèrmit en todo kaso ta inkluí:

• - e término denter di kua mester bolbe importá e veredelingsprodukten (produktonan pa perfekshonamentu pasivo) na Boneiru, Saba òf Sint Eustatius;
• - e método di kalkulashon pa determinashon di e suma di dispensashon di impuesto di importashon;
• - e forma riba kua por identifiká e merkansia ku ta bai eksportá temporalmente den e veredelingsprodukten (produktonan pa perfekshonamentu pasivo) ku ta importá bèk.

Tin kondishonnan na vigor ora di otorgá pèrmit ekonómiko?

Sí, lo no otorgá e pèrmit si na Boneiru, Saba òf Sint Eustatius tin un kompania ku ta kapas pa kumpli ku e eksigensianan spesífiko pa e passieve veredeling (perfekshonamentu pasivo) kontra kondishonnan komparabel manera preis, kalidat i tempu di suministro.

Kuantu impuesto di importashon mi mester paga ora mi laga perfekshoná mi merkansia pasivamente?

Ora di importá e merkansia perfekshoná ta determiná e balor di duana i kalkulá e impuesto di importashon pa paga. Despues ta kita for di e impuesto di importashon si na e momentu ei lo a importá e merkansia den estado no perfekshoná.

Ehèmpel: Na Boneiru ta eksportá bou di e areglo passieve veredeling (perfekshonamentu pasivo): - ròlnan di tela di katuna ku un balor di USD 6000,00.

Den eksterior un fabrikante ta usa e tela pa traha T-shirt. Ta manda e T-shirtnan aki na Boneiru. E balor di duana ora di importá e T-shirtnan na Boneiru ta:
 

Balor ròlnan di tela	USD 6.000,00
Preis di fabrikante	USD 4.000,00
Gastu di karga i seguro	USD 750,00
	------------------
Balor di Duana	USD 10.750,00
ABB pa paga ora di importashon		USD 860,00 (8% van USD 10.750,00)
Kita: ABB riba e produkto di eksportashon (lo a deb’é si na e momentu ei lo a importá e tela)		USD 480,00 (8% van USD 6000,00)
		----------------
ABB ku debe ora di importashon di e T-shirtnan		USD 380,00
		==========

Pa merkansia ku a drecha kontra pago, e gastunan pa drecha ta konta komo balor di duana. Esaki e ora ei mester ta e úniko prestashon ku e portador di e pèrmit (e persona ku a eksportá e merkansia for di Boneiru, Saba òf Sint Eustatius) ta hasi pa esei.

Ora di passieve veredeling (perfekshonamentu pasivo) semper mi mester paga impuesto di importashon?

Nò, si a drecha e merkansia pòrnada a base di un obligashon di garantia di kontrakt òf legal bo no ta paga impuesto di importashon ora di re-importashon. Sí bo mester por demostrá ku ta papia di un drechamentu pòrnada.

Mi ke laga perfekshoná merkansia pasivamente, kiko mi mester hasi?

Si bo ke trese merkansia bou di e areglo passieve veredeling (perfekshonamentu pasivo), tuma kontakto na ora ku Duana Hulanda Karibense, tim Servisio na kliente (pa e datos, wak bou di kontakto). E ora ei bo tin sufisiente tempu pa tuma nota di tur e kondishonnan i tin sufisiente tempu pa trata bo petishon pa otorgashon di un pèrmit promé ku e eksportashonen di e merkansia.

Di ki forma Duana sa ku mi a entregá un deklarashon di duana pa eksportashon sigun un variante spesífiko?

For di e kódigonan ku bo a yena den e hòkinan 1 i 37 di bo deklarashon di duana ta sali na kla ku bo ta hasi un demanda riba e destinashon di duana aki. E kódigonan aki bo ta haña den e Handleiding Enig document (Manual Dokumento so).