Importashon ku depósito den un lugá pa merkansia suheto na akseins (AGP)

Pa medio di un deklarashon pa e destinashon di duana importashon ku depósito den un lugá pa merkansia suheto na akseins (AGP) ta importá merkansia suheto na akseins na Hulanda Karibense. Bo ta paga solamente e ABB ku debe pa motibu di importashon. En konekshon ku e importashon ei ta hiba e merkansia na un AGP. Tanten ku e merkansia ta den e AGP no ta debe e akseins.

Mi a kaba di atende mi deklarashon di importashon. Mi mester hasi otro formalidat di duana pa por transportá e merkansia pa e AGP?

Transporte pa i depósito di e merkansia suheto na akseins den e AGP ta tuma lugá hasiendo uso di un enkargo di transporte. E portador di e pèrmit di e AGP ta redaktá e enkargo di transporte. Riba e enkargo di transporte e portador di pèrmit a hasi un deklarashon ku:

lo hiba e merkansia na e AGP;
lo depositá nan eiden;
lo inkluí nan den su atministrashon.

Kua formulario òf dokumento mi ta usa komo enkargo di transporte?

Komo enkargo di transporte ta usa e deklarashon di importashon di papel, ku kua bo a paga e ABB.

Ehèmpel di un importashon di merkansia suheto na akseins ku depósito den un AGP:
Ta transportá un karga di serbes den un konteiner riba un barku pa Boneiru. Despues di yegada, ku òf sin depósito entretantu den un espasio pa depósito temporal, ta entregá un deklarashon pa importashon pa e serbes ku depósito den un AGP. Riba e deklarashon aki ta paga e impuesto di konsumo (ABB) ku ta debe pa importashon di e serbes. Ku un enkargo di transporte despues ta hiba e merkansia na e AGP.

Ora di importashon ku depósito den un AGP semper mi mester paga ABB?

Si bo ta importá merkansia suheto na akseins ku ta materia prima òf produkto mitar akabá pa un -otro- produkto suheto na akseins ku ta bai fabriká, komo produktor kisas bo por haña dispensashon di kobransa di ABB ora di importashon. E dispensashon di ABB pa produktor ta inkluí den artíkulo 6.20 insiso 1, lèter a di e Belastingwet BES (Lei di Impuesto BES). Pa por apliká e dispensashon aki bo mester entregá un petishon promé ku importahson di e merkansia serka e inspektor di Ofisina di Impuesto Hulanda Karibense.

Paga tinu! Solamente ta pèrmití pa produsí merkansia suheto na akseins den un AGP!

Di ki forma Duana sa ku mi ta hasi un demanda ku mi deklarashon riba e destinashon importashon ku depósito den un AGP?

For di e kódigonan ku bo a yena den e hòkinan 1 i 37 di bo deklarashon di duana ta sali na kla ku bo ta hasi un demanda riba e destinashon di duana aki. E kódigonan aki bo ta haña den e Handleiding invulling Enig document (Manual yena un Dokumento so).