Pagadó di impuesto pa habitante

Areglo unilateral

Te ku 2011 solamente en relashon ku Noruega i entre Hulanda, Antia Hulandes i Aruba a proveé un areglo pa prevení kobransa dòbel. Entrante di promé di yanüari 2011 abo komo pagadó di impuesto interior por hasi un apelashon riba e asina yamá areglo ‘unilateral'.

E areglo nobo aki ta proveé prevenshon di kobransa dòbel pa entrada for di paisnan ku kua no a sera tratado pa prevenshon di kobransa dòbel. E areglo aki yama e ‘Besluit voorkoming dubbele belasting BES’ (Desishon prevenshon kobransa dòbel BES). Aplikashon di e Desishon aki tambe ta hiba na prevenshon di kobransa dòbel. Pa mas informashon tokante prevenshon di kobransa dòbel bo por tuma kontakto ku e Ofisina di Impuesto/CN.

Kua entrada ta kai bou di impuesto riba entrada?

E impuesto riba entrada ta distinguí tres fuente di entrada:

• kapital móbil (manera interes i dividendo, pero tambe por ehèmpel entrada for di un asina yamá interes konsiderabel);
• empresa i trabou (por ehèmpel ganashi for di un kompania di un persona òf firma, entrada for di otro aktividat i for di un empleo);
• derecho riba pago periódiko (por ehèmpel pago for di renta vitalisio).

Ta debe impuesto riba entrada solamente riba resultado prosedente di un di e fuentenan aki. Otro entradanan no ta kargá ku impuesto riba entrada. Riba un herensia òf un premio ku bo ta gana den un loteria por ehèmpel bo no ta debe impuesto riba entrada. E ‘entradanan’ aki no ta kai bou di e enumerashon aki riba. Asina en prinsipio riba entrada insignifikante for di aktividat den esfera di famia tampoko no ta kargá ku impuesto.

Biennan inmóbil

Entrada for di biennan inmóbil (eksepto e propio bibienda ku ta sirbi komo lugá di residensia prinsipal i e bien inmóbil ku ta parti di e kapital di un empresa individual), no ta karga ku impuesto mas.

Gastunan dedusibel

Ta kobra impuesto solamente riba e entrada nèto for di un fuente. Esei ta enserá ku ta pèrmití pa tene kuenta ku gastu dedusibel. Importante ta ku e gastunan dedusibel pa fuente aki (eksepto ora di resultado for di empresa òf profeshon) no por hiba na un suma negativo. E gastunan dedusibel den un aña pues no por ta mas haltu ku e entrada for di e fuente ei. Si dado kaso gastunan den un aña tòg ta mas haltu ku e entradan, e ora ei ta pèrmití pa den e sinku añanan siguiente kompensá loke ta mas ku e entrada for di e fuente ei.

Banda di e posibilidat pa dedukshon di gastunan na e diferente fuentenan di entrada ta eksistí e posibilidat di dedukshon di debernan personal i gastunan ekstraordinario. Bou di esaki ta kai por ehèmpel:

• e dedukshon di interes riba fiansanan hasí pa finansiamentu, mantenshon i mehorashon di bo propio bibienda ku ta sirbi komo residensia prinsipal, inkluso e gastunan di un seguro di riesgo di fayesimentu ku ta baha sigun e durashon, i  - te ku un suma limitá -  gastu di mantenshon;
• gastu den kaso di malesa, invalides;
• gastu di estudio di bo mes òf yunan ku ta studiando.