Tarifa impuesto di inmueble
E tarifa pa e impuesto di inmueble na e momentu aki ta 17,5% di e benefisionan for di e inmueble. E tarifa aki ta kalkulá riba e entrada fiktisio di 4% di e balor di e inmueble. E tarifa efektivo ta 17,5% X 4% = 0,7%.
Ehèmpel for di práktika
Ban bisa ku riba promé di yanüari 2016 bo ta doño di un inmueble ku un balor di USD 200.000 i ta trata di un di dos kas. Pa un di dos kas (for di 2014) ta konta un dispensashon riba e promé USD 70.000,-. Ta kalkulá e impuesto riba USD 130.000. Riba esei bo ta paga 0,7% impuesto di inmueble =USD 910.
Ban bisa, un sosiedat (vennootschap) for di 2014 ta doño di un inmueble ku un balor di USD 500.000. Ta trata di un bibienda. For di 2014, pa bibienda ku no ta residensia prinsipal di e doño (di dos bibienda) ta konta un dispensashon di USD 70.000,-. E dispensashon aki for di 2014 tambe ta aplikabel pa entidatnan. Ta kalkulá e impuesto riba USD 430.000. Na 2016 e entidat riba esei ta paga 0,7% impuesto di inmueble = USD 3010.
Ban bisa, un sosiedat (vennootschap) for di 2016 ta doño di un hotèl ku un balor di USD 300.000. No tin dispensashon ta aplikabel. Pa hotèlnan ku ta propiedat di un persona no natural e tarifa di impuesto ta suma 10%. Pues, efektivamente ta kobra 0,4% di impuesto (= USD 1200).
Porsentahe di Opcenten Insular riba e impuesto di inmueble
Riba inmueble riba kua ta kobra impuesto di inmueble, kada teritorio insular por kobra porsentahe di opcenten (sobrekargo). E teritorio insular Boneiru entrante 2011 a fiha e porsentahe di opcenten ei na 15% di e impuesto di inmueble ku ta kobra. Na e islanan Saba i Sint Eustatius no ta kobra porsentahe di opcenten riba e impuesto di inmueble.
Entrante promé di yanüari 2020 a subi e opcenten riba e impuesto di inmueble. Ta trata di un subida di 15% pa 30% riba e impuesto di inmueble di Reino di 0.7%. Esaki ta nifiká ku e impuesto di inmueble di 0.805% ta bira 0.91% entrante 2020.