Responsabilidat pa debenan di belasting di un empresa

Komo empresario, bo ta dil ku diferente formanan di responsabilidat. Den e artíkulo aki, ta splika e diferente formanan di responsabilidat i ta klarifiká kua riesgo fiskal abo i bo empresa lo por tin. Tambe ta diskutí medidanan di prevenshon pa limitá e riesgonan fiskal.

Responsabilidat di Direktornan

E responsabilidat di direktornan ta aplikabel na promé lugá pa direktornan di empresanan ku

  • ta desaroyá aktividatnan komersial
  • ta un persona hurídiko
  • tin derechi kompletamente legal

Den práktika, esaki ta para prinsipalmente pa direktornan di NV i BV.

Pero e responsabilidat di direktiva tambe ta aplikabel pa direktornan di empresanan di un entidat sin personalidat hurídiko òf un entidat ku tin personalidat hurídiko pero no tin kapasidat hurídiko di forma kompleto. Algun ehèmpel ta un VOF (vennootschap onder firma) òf un CV (commanditaire vennootschap).

Tambe direktornan di asosiashonnan i fundashonnan ku tin derechi legal kompletu ta kai bou di e mes un lei. Un asosiashon òf fundashon tin derechi legal kompleto si nan ta fundá pa un akta notarial.

Si e direktor di un empresa filial tin un otro empresa madre, por pone e direktornan di e empresa menshoná último responsabel.

Tambe si bo ta direktor di un persona hurídiko estranhero, bo por haña bo ta dil ku e asina yama responsabilidat di direktornan. Esaki ta e kaso si bo empresa ta un entidat ku no ta establesé riba e islanan BES i bo ta e lider di e establesimentu físiko riba e islanan BES òf e representante físiko ku ta biba òf establesé riba e islanan BES.

Ki ora bo ta responsabel?

Tur e direktornan menshoná ariba por ta responsabel si nan empresa no por paga impuestonan i primanan* i si haña ku ta probá ku esaki ta e resultado di mal maneho di nan banda.

Direktornan ta responsabel kolektivamente pa e maneho di e empresa. Kada direktor por tin responsabilidat pa e totalidat, si komo resultado di e maneho, keda sin paga impuestonan i primanan.

Direktornan mester raportá di forma aktivo na Belastingdienst ku nan no por kumpli ku nan obligashonnan di impuesto. Tambe nan por ta responsabel si nan ta kulpabel di no a raportá na tempu ku no por paga e impuestonan i primanan.

* E impuesto riba suèldu, prima segun Lei di Seguro General di Penshun di Behes BES, prima segun Lei di Seguro General di Viuda i Huerfanonan BES, Prima di Seguro di Kuido BES, prima segun Lei di Seguro di Gastunan Médiko BES, prima segun Lei di Seguro di Aksidente BES, prima segun Lei di Sesantia BES i prima segun Resolushon di Seguro di Kuido BES, impuesto riba propiedat, impuesto di entrada, impuesto di gastu general, impuesto di transferensia, impuesto riba wega di plaka i akseins.

Responsabilidat di kontratista

Bo ta hür trahadó? Anto komo esun ku ta hür trahadó, bo por ta responsabel pa loonheffing i ora e persona ku ta suministrá e forsa di trabou no paga e impuestonan i primanan aki.

E regla di responsabilidat di esun ku ta hür trahadó tin komo meta pa prevení ku esnan ku ta suministrá trabou ta hasi mal uso ora ta trata di pagonan di loonheffing. Ta papia di hür trahadó ora, esnan ku ta hür trahadó ta pone trahadonan den su servisio na disposishon di un otro persona, esta esun ku ta hür e trahadó serka dje.

Esun ku ta hür trahadó por ta responsabel pa loonheffing ora e persona ku ta suministrá e forsa di trabou no paga e impuestonan i primanan aki. Banda di esun ku ta hür trahadó, esun ku ta pasa e trabou pa un otro tambe por ta responsabel. Esaki ta konta pa henter e kadena di kontratistanan ku a hasi uso di personal di hür.

Esun ku ta hür trahadó i esun ku ta pasa e trabou pa un otro por limitá e riesgo di nan responsabilidat dor di pidi, por ehèmpel, un deklarashon tokante kondukta di pago for di e persona ku ta hür personal i tambe ku esaki ta kumpli ku nan obligashonnan atministrativo. Tambe, e persona ku ta hür trahadó por limitá e konsekuensianan finansiero di un responsabilisashon dor di paga direktamente na Belastingdienst/Caribisch Nederland e parti di e montante di faktura ku ta destiná pa e impuestonan di suèldu, indikando un karakterístika duna di antemano òf depositando esaki riba un kuenta separá.

‘Ketenaansprakelijkheid’ (Responsabididat en kadena)

E regla di ’ketenaanpsrakelijkheid’ tin komo meta pa prevení ku kontratistanan i supkontratistanan ta hasi mal uso di kontratashon di trabou ora ta trata di pagonan di loonheffing. Bou di loonheffing ta kai impuesto riba suèldu, seguro di trahadó ZV/OV/CES, seguro médiko, primanan di AOV/AWW.

E regla di ’ketenaansprakelijkheid’ ta pone e kontratista responsabel pa e loonheffing ku su supkontratista mester paga relashoná ku (un parti di) e trabou. Na su turno, e supkontratista por supkontratá (un parti di) e trabou ku a kontratá na dje, na un otro persona. Asina por surgi un kadena di kontratistanan (i supkontratistanan) di kua tur ta envolví den e ehekushon di un trabou. E regla di ’ketenaanpsrakelijkheid’ ta pone kada konekshon den e kadena responsabel pa tur e konekshonnan siguiente.