Unda mi ta haña e reglanan di orígen?
E reglanan di orígen LGO ta inkorporá den e LGO-besluit (desishon LGO).
E islanan BES (Boneiru, Saba i Sint Eustatius o sea Hulanda Karibense) huntu ku tur otro isla di Antia Hulandes di ántes (Aruba, Kòrsou, Sint Maarten) tin e státus di Pais i Teritorio di Ultramar (LGO). Paisnan LGO ta pais i teritorio no Oropeo ku tin relashonnan spesial ku e Union Oropeo (UO). E relashonnan spesial aki ta dirigí riba e desaroyonan ekonómiko i sosial di paisnan LGO i ta reglá den e desishon LGO .
Bou di sierto kondishonnan, e desishon LGO ta proveé un tarifa di duana mas favorabel òf eksonerashon di derecho di importashon pa merkansia ku ta importá na Union Oropeo for di un pais LGO. Den esaki ta importante ku e merkansia aki ta originá den un pais LGO.
Konsiderá merkansia komo merkansia ku ta originá den e islanan BES
Bo merkansia por haña e státus di orígen LGO si ta kumpli ku e reglanan di orígen. Pa merkansia ku a optené òf produsí kompletamente riba e islanan BES ta basta simpel pa evaluá si nan ta kumpli ku e reglanan. Pa merkansia ku a optené pafó di e islanan BES i ku na e islanan BES a pasa den sierto adaptashon òf prosesamentu ta un tiki mas difísil pa husga si eseinan ta kumpli ku e reglanan.
Kon mi por proba den UO ku mi merkansia tin e státus “orígen LGO”?
Ora ta kumpli ku e reglanan di orígen, bo por usa e sertifikado di orígen (EUR. 1) ora di eksportá bo merkansia. Komo prueba di e státus “orígen LGO”, den e pais di importashon na UO bo por usa e sertifikado EUR. 1.
Bo por plantia bo situashon spesífiko na Duana Hulanda Karibense, tim Servisio na kliente (pa e datonan wak bou di kontakto). Hasi esaki por lo ménos dos siman promé ku lo bai eksportá e merkansia.