Boneiru, Sint Eustatius i Saba ta forma un parti di e areglo di asosiashon Pais i Teritorio Otro Banda di Laman (LGO).
Esaki ta nifiká ku hopi bia por importá merkansia kontra un tarifa faborabel di derecho di duana den e Union Oropeo (UO). Den esaki ta importante pa e merkansia aki haña e asina yamá státus orígen LGO.
Bo merkansia por haña e státus orígen LGO ora kumpli ku e reglanan di orígen ku ta pertenesé na e areglonan ei. Entrante dia promé di yanüari 2020 tambe a introdusí e sistema di eksportador registrá (e sistema REX) den e LGO.
E sistema REX ta un sistema nobo pa sertifikashon di e orígen di merkansia ku Union Oropeo a introdusí, ku bista pa areglo di komersio preferensial, inkluso e areglonan preferensial i preferensia di tarifa basá riba e desishon LGO. E sistema REX ta remplasá kompletamente e sistema aktual di sertifikashon di orígen a base di sertifikado di orígen (EUR.1) emití pa instanshanan di gobièrnu (inkluso Duana CN).
E sistema REX ta basá riba sertifikashon propio pa eksportador ku por redaktá e deklarashon di orígen nan mes. Pa por hasi un deklarashon di orígen, e eksportador mester bira un eksportador registrá, loke ta nifiká ku e outoridat kompetente di su pais (Duana CN) mester registá e eksportador den e database di Union Oropeo (UO).
Mas informashon tokante e reglanan di orígen den e kuadro aki por haña den e LGO-besluit (desishon LGO).