Outo i transporte persona privá

Ora un empleado hasi uso di su propio outo pa biahe di trabou, e dunadó di trabou por kompensá e gastunan relashoná ku esei. Liber di impuesto e dunadó di trabou por kompensá e gastunan te ku un montante di USD 0,20 pa kilometer. Paga tinu! Kilometer di kas pa trabou no ta kilometer komersial i p’esei nunka no por kompensá nan liber di impuesto. Bou di tráfiko di kas pa trabou (woon-werkverkeer) ta komprondé biahamentu di e empleado for di su kas pa e adrès kaminda e negoshi ta situá òf for di unda e dunadó di trabou ta rùn su negoshi.

Outo di famia di e negoshi

Ora un dunadó di trabou pone un outo di famia na disposishon di un empleado i e empleado usa e outo aki privá tambe, - inkluso tráfiko di kas pa trabou – e ora ei ta konta 15% di e balor di un outo nobo, inkluso algemene bestedingsbelasting (impuesto general di konsumo) komo parti di e suèldo.

Importante!

  • Pa loke ta trata outo di famia ku, promé ku e Belastingwet BES a drenta na vigor, tabata registrá den e registro di number di outo, tambe ta komprondé bou di algemene bestedingsbelasting: omzetbelasting (impuesto riba volúmen di benta) i impuesto di importashon. 
  • Kilometer di kas pa trabou no ta kilometer komersial i, pa e pregunta si e empleado ta usa e outo privá, ta konsiderá komo kilometer privá. Bou di tráfiko di kas pa trabou ta komprondé biahamentu di e empleado for di su kas pa e adrès kaminda e negoshi ta situá òf for di kua e dunadó di trabou ta rùn su negoshi. Tambe den e kaso ku e empleado riba petishon di e dunadó di trabou ta bai kas ku e outo di famia, por ehèmpel pa prevení ladronisia òf destrukshon, ta papia di ponementu na disposishon, i e ahuste fiskal lo mester tuma lugá. Si e empleado haña e outo den transkurso di aña, mester kalkulá e ahuste sigun tempu. Ban bisa ku e ahuste fiskal pa motibu di e uso privá di e vehíkulo pa henter e aña ta USD 2.400,-, pero e aña ei e empleado mag usa e outo privá solamente tres luna. E uso privá e ora ei ta 3/12 parti di USD 2.400,-, pues USD 600,-. Si e empleado mester paga e dunadó di trabou un kompensashon pa e uso di e vehíkulo, e ora ei ta kita e kompensashon ku a paga for di e ahuste di 15% ku t’ei pa e motibu aki. Únikamente e gastunan ku e dunadó di trabou a paga direktamente na e empleado por kita for di e ahuste. Si e empleado paga mas ku e ahuste di 15% menshoná, ta pone e benefisio na sero. Loke por ta di mas no por kita komo gastu di profeshon for di e belasting riba entrada.

Ban bisa ku un empleado ta keda basta tempu den eksterior pa trabou. E empleado ta entregá e yabi di outo, e dokumentonan i e outo na e dunadó di trabou. Durante e temporada aki e outo no ta na su disposishon. Esei ta nifiká ku e temporada aki no ta konta pa kalkulashon di e ahuste. Si e empleado ta di biahe pa eksterior i e no ta entregá e yabi di outo, e dokumentonan i e outo na e dunadó di trabou, e ora ei e outo ta keda na su disposishon i e ahuste mester tuma lugá pa e periodo aki tambe.