Si bo empleado hasi uso di su propio outo pa biahe di empresa bo por kompensá gastu relashoná ku esei. Sin paga impuesto bo por kompensá e gastunan te ku un montante di USD 0,20 pa kilometer. Paga tinu! Kilometer di kas pa trabou no ta kilometer komersial i p’esei nunka no por kompensá nan liber di impuesto. Bou di tráfiko di kas pa trabou (woon-werkverkeer) ta komprondé biahamentu di e empleado for di su kas pa e adrès kaminda bo empresa ta situá òf for di unda bo ta rùn bo empresa.
Outo di famia di e empresa
Si bo pone un outo di famia na disposishon di bo empleado i e empleado usa e outo aki privá tambe, - inkluso tráfiko di kas pa trabou – bo mester konta 15% di e balor di un outo nobo, inkluso algemene bestedingsbelasting (impuesto general di konsumo) komo parti di e suèldo.
Importante!
- Pa loke ta trata outo di famia ku, promé ku e Belastingwet BES (Lei di Impuesto BES) a drenta na vigor, tabata registrá den e registro di number di outo tambe ta komprondé bou di algemene bestedingsbelasting: omzetbelasting (impuesto riba volúmen di benta) i impuestonan di importashon.
- Kilometer di kas pa trabou no ta kilometer komersial i, pa e pregunta si e empleado ta usa e outo privá, ta konsiderá komo kilometer privá. Bou di tráfiko di kas pa trabou ta komprondé biahamentu di e empleado for di su kas pa e adrès kaminda bo empresa ta situá òf for di kua bo ta rùn bo empresa. Tambe den e kaso ku e empleado riba bo petishon ta bai kas ku e outo di famia, por ehèmpel pa prevení ladronisia òf destrukshon, ta papia di ponementu na disposishon, i e ahuste fiskal (fiscale bijtelling) mester tuma lugá. Si e empleado haña e outo den transkurso di aña, mester kalkulá e ahuste fiskal sigun tempu. Ban bisa ku e ahuste fiskal pa motibu di e uso privá di e vehíkulo pa henter e aña ta USD 2.400,-, pero e aña ei e empleado por usa e outo privá solamente tres luna. E uso privá e ora ei ta 3/12 parti di USD 2.400,-, pues USD 800,-. Si e empleado mester paga bo un kompensashon pa e uso di e vehíkulo, e ora ei ta kita e kompensashon ku a paga for di e ahuste di 15% ku t’ei pa e motibu ei. Únikamente e gastunan ku e empleado a paga direktamente na bo por kita for di e ahuste. Si e empleado paga mas ku e ahuste di 15% menshoná, ta pone e benefisio na sero. Loke por ta di mas no por kita komo gastu di profeshon for di e impuesto riba entrada.
Ban bisa ku un empleado ta keda basta tempu den eksterior pa trabou. E empleado ta entregá bo e yabi di outo, e dokumentonan i e outo. Durante e temporada aki e outo no ta na su disposishon. Esei ta impliká ku e temporada aki no ta konta pa e kalkulashon di e ahuste. Si e empleado ta di biahe pa eksterior i e no ta entregá bo e yabi di outo, e dokumentonan i e outo, e ora ei e outo ta keda na su disposishon i e ahuste mester sosodé pa e periodo aki tambe. Si bo pone e outo na disposishon di un otro empleado durante e periodo aki, e ora ei e ahuste pa e parti di aña aki ta konta pa e otro empleado aki.
Tráfiko di kas pa trabou
No ta pèrmití pa bo duna un kompensahon liber di impuesto pa tráfiko di kas pa trabou. Bou di tráfiko di kas pa trabou ta komprondé biahamentu di e empleado entre su kas i e adrès kaminda bo empresa ta situá òf for di unda bo ta rùn bo empresa.