Impuesto di importashon empresa

Impuesto general di konsumo (ABB)

Ta kobra e ABB riba e balor di duana di e merkansia. Den e balor di duana ta inkluí:

1. e derechonan ora di importashon, impuesto i imposishonnan, ku eksepshon di e ABB ku debe pa e importashon na un entidat públiko;
2. e gastunan adishonal, manera gastu di komishon, emboltura, transporte i seguro te na e lugá di destinashon.

Konsultá e Douane- en Accijnswet BES (Lei di Duana i Akseins BES) (kapítulo 3) i e Belastingwet BES (Lei di Impuesto BES) (artíkulo 6.18) si bo ke sa tur kos tokante determinashon di e balor di duana i e komponentenan ku mester inkluí den e balor di duana pa e kobransa di e ABB.

Tarifa ABB

Ku eksepshon di algun, e tarifa na ABB ku bo mester paga pa tur merkansia ta:

• na Boneiru: 8%;
• na Saba i Sint Eustatius: 6%.

Algun eksepshon ta:

• E tarifa di ABB pa outo di famia ta suma 25%.
• E tarifa di ABB entrante 1-1-2020 pa outo di famia sin emishon di CO2 (eléktriko) ta suma 0%. E definishon di outo di famia ta inkorporá den artíkulo 6.1 lèter f di e Belastingwet BES (Lei di Impuesto BES)  i riba e Tarievenblad Heffing ABB op personenauto's (Papel di Tarifa Imposishon ABB riba outo di famia).

Dispensashonnan

Entrante dia promé di yanüari 2013 a amplia e dispensashon di ABB riba promé nesesidatnan di bida na importashon. E dispensashon solamente ta aplikabel pa merkansia klasifiká den e kapítulonan 4, 7 te ku 11, 15, 17 i 19 di e sistema harmonisá.

Globalmente ta trata di e siguiente kategoria di merkansia ku ta pertenesé na e kapítulonan di e sistema harmonisá menshoná ariba:

• Kapítulo 4: Lechi i produkto di lechi; webu di para; honing natural; produkto komibel di orígen di animal;
• Kapítulo 7: Berdura, mata, rais i batata, pa alimentashon;
• Kapítulo 8: Fruta; kaska di fruta sítriko i di milon;
• Kapítulo 9: Kòfi, te, maté i speserei;
• Kapítulo 10: Grano;
• Kapítulo 11: Produkto di e industria di hariña; malta; fékula (zetmeel); inulina; gluten di trigo;
• Kapítulo 15: Fèt i zeta (di bestia i di mata) i produkto derivá; elaborá
• Fèt di alimento; tabata di orígen di animal òf di mata;
• Kapítulo 17: Suku i kos dushi trahá di suku;
• Kapítulo 19: Produkto trahá di grano, di hariña, di fékula òf di lechi; bolo.

Ora di paga ABB riba produkto ku un biahero a trese, inklushon di gastu di karga i seguro no ta aplikabel.

Akseins

E tarifa ku bo mester paga na akseins ta varia pa tipo di produkto suheto na akseins. Ta kobra e akseins riba e kantidat di produkto suheto na akseins ku bo ta importá. Produkto suheto na akseins ta: gasolin, serbes, biña, sobrá produkto ku ta kontené alkohòl, i produkto di tabako.

Pa e tarifanan di akseins, aki nos ta referí bo na kapítulo IV di e Douane- en Accijnswet BES (Lei di Duana i Akseins BES).

Na Boneiru bo ta paga akseins ora di importashon i di despacho di tur produkto suheto na akseins.

Na Saba i Sint Eustatius solamente bo ta paga akseins ora di importá i di despacho di gasolin. Ora di importá serbes, biña, sobrá produkto ku ta kontené alkohòl i produkto di tabako, na Saba i Sint Eustatius pues bo no ta paga akseins.