Importashon temporal

Tin bia ta importá un mashin, aparato, òf otro bien temporalmente na Hulanda Karibense, por ehèmpel pa eksibié òf demostr’é na un kumpradó potensial. Ora e situashon aki tuma lugá, aplikashon di e destinashon di duana importashon temporal ta un posibilidat. Pasobra despues di un tempu korto ta bolbe eksportá e bien. Si esaki no pasa mester paga e impuesto di importashon ainda.

Semper mi por importá merkansia temporalmente na Hulanda Karibense, ku dispensashon di impuesto di importashon?

Pa e kontesta, e siguiente asuntunan aki ta importante:

Ta dependé di e propósito pa kua ta importá e merkansia temporalmente; Por ehèmpel, drechamentu di produkto ta un propósito pa kua por otorgá dispensashon di impuesto di importashon. Un bista general ku dispensashonnan disponibel (propósitonan) bo ta haña aki.
Pa sierto dispensashon mester di un pèrmit di e inspektor di Duana Hulanda Karibense pa por apliká nan; e pèrmit sobre todo lo inkluí denter di kua término mester bolbe eksportá e merkansia ku a importá temporalmente. E pèrmit por ta un bia so, pero e por tin un karakter kontinuo tambe.

Pa merkansia ku por importá temporalmente ku dispensashon di impuesto di importashon semper mester entregá un deklarashon elektróniko (Asycuda World) serka Duana?

Nò, ta depende di e tipo di dispensashon (tipo di bienes/propósito), tin bia por hasi e deklarashon verbalmente tambe. Esei ta konta por ehèmpel pa e importashon temporal di pallet.

Na Hulanda Karibense mi por usa un Carnet ATA (Carnet Admission Temporaire / Temporary Admission) pa importá mi merkansia temporalmente?

Hulanda Karibense tambe ta partisipá den e akuerdo pa uso di e Carnet ATA, pues bo por usa e dokumento aki pa duna merkansia e destinashon di duana importashon temporal. Espesialmente biahero ta hasi uso di dje pa por importá otro merkansia ku merkansia personal temporalmente.

E merkansia ta keda sin kambio. Mas tantu ta usa produkto menshoná riba un Carnet ATA pa por mustra òf demonstrá nan na kliente potensial en konekshon ku hasimentu di un pedido pa kompra. Tambe ta usa e dokumento hopi bia pa importashon temporal di material profeshonal (aparato pa midi, ekipo pa grupo ku ta traha sine, i kos semehante).

Kua kondishonnan mas ta konta ora di importashon temporal ku dispensashon?

e inspektor por deseá pa bo duna un bòrg (en konekshon ku e kondishon di re-eksportashon);
si no por establesé e identidat di e merkansia ora di importashon, e inspektor por nenga e dispensashon. Ku establesé e identidat ke bisa ku Duana ta registrá karakterístika úniko di e merkansia. Esaki ta importante pa por estables’é ora di eksportá e merkansia importá.

Di ki forma Duana sa ku mi ta hasi un demanda riba e destinashon di duana importashon temporal ku dispensashon di impuesto?

For di e kódigonan ku bo a yena den e hòkinan 1 i 37 di bo deklarashon di duana ta sali na kla ku bo ta hasi un demanda riba e destinashon di duana aki. E kódigonan aki bo ta haña den e Handleiding Enig document (Manual Dokumento so).

Paga tinu: diferente kódigo di areglo (hòki 37) ta posibel. Kua bo tin mester ta dependé di e dispensashon ku ta aplikabel.