Importashon

Krédito mensual

Pa duna merkansia e destinashon importashon bo ta entregá un deklarashon di importashon serka Duana. A ménos ku un dispensashon ta aplikabel, riba e deklarashon aki bo mester paga impuesto di importashon mesora serka Ofisina di Impuesto Hulanda Karibense (B/CN). E Douane en accijnswet BES (Lei di Duana i akseins BES) ta duna e posibilidat pa no paga e impuesto di importashon ku debe serka kada deklarashon. Esaki ta e asina yamá maandkrediet (pèrmit krédito mensual). E ta nifiká ku B/CN ta pone tur pago na impuesto di importashon pa e merkansia ku bo a deklará durante un luna kalendario huntu.

Na komienso di e luna nobo bo ta risibí di B/CN un bista general di e impuestonan pa kua bo a risibí krédito. E total di e impuestonan aki bo ta paga di bia serka B/CN. E pago aki mester ta hasí denter di 8 dia kalendario despues di fin di e luna kalendario den kua a akumulá e debe na duana.

Di e forma aki bo por kaba di atendé e proseso di deklarashon di un forma mas simpel i bo tin e merkansia na bo disposishon mas lihé.

Petishon pa bini na remarke pa krédito mensual

• bo ta entregá un petishon por eskrito serka e inspektor di Duana Hulanda Karibense, tim Servisio na kliente (pa e datonan, wak bou di kontakto);
• huntu ku e petishon bo ta aneksá un ekstrakto di e registrashon di bo kompania serka Kámara di Komèrsio;
• den e petishon bo ta menshoná e kantidat promedio di deklarashon di importashon ku bo ta entregá pa luna na Duana Hulanda Karibense i pa kada tipo di impuesto di importashon e suma pa kua bo ke risibí un krédito mensual. Tene kuenta den esaki ku un posibel kresementu di bo aktividatnan di importashon;
• na nòmber di e Ontvanger di Ofisina di Impuesto Hulanda Karibense e inspektor, den konsulta ku bo, lo determiná altura di e suma pa e krédito mensual, i kua suma bo mester paga komo bòrg (siguridat) pa esaki.

Den e pèrmit krédito mensual por inkorporá kondishonnan mas aleu.

Dispensashon di impuesto di importashon

Den hopi kaso tin dispensashon di impuesto di importashon na vigor. Esaki ta dependé di:

• e tipo di merkansia;
• e destinashon di e merkansia.

Den mayoria kaso tin un eksonerashon na vigor pa tantu e impuesto general di konsumo (ABB) komo pa e akseins, pero no tur ora. Na e rúbrika ‘dokumento’ bo ta haña un bista general ku tur dispensashon ora di importashon definitivo di merkansia.

Aplikashon dispensashon di deklarashon pa importashon

Den e deklarashon ku bo ta entregá serka Duana, pa sòru ku ta apliká e dispensashon riba bo deklarashon pa importashon, menshoná e kódigonan korekto den e hòkinan 1 i 37. E kódigonan aki ta inkluí den e Handleiding Enig document (Manual Dokumento so) ku bo ta haña den e rúbrika ‘downloads’. Dor di menshoná e kódigonan aki e aplikashon di deklarashon di Duana Hulanda Karibense (Asycuda World) lo apliká e dispensashon. Klaro ku Duana tambe lo kontrolá si ta na su lugá ku bo ta reklamá un dispensashon di impuesto di importashon spesífiko.