Depósito den un depósito di duana

Maneho di un depósito di duana

Por supdividí depósitonan di duana den

• destiná pa depósito pa tur hende;
• destiná pa depósito pa un gerente.

Depósito di duana destiná pa depósito pa tur hende

Un depósito di duana destiná pa depósito pa tur hende ta un edifisio ku ta supdividí pa usuario. Kada usuario mes ta responsabel pa e depósito i e maneho di e merkansia presente den e propio espasio, ku ta bou di supervishon di duana. Komo norma e tipo di depósito aki lo ta un depósito será (wak despues).

Depósito di duana destiná pa depósito pa un gerente

Ora di un depósito di duana destiná pa depósito pa un gerente, e gerente aki ta responsabel pa tur merkansia depositá den e depósito. E gerente di un depósito di duana por depositá merkansia ku no ta di dje den e espasio di depósito. E gerente por depositá merkansia pa otronan tambe.

Paga tinu: E gerente semper ta responsabel na promé lugá pa e merkansia depositá den su depósito, sin importá si e merkansia ta di dje i sin importá e motibu di posibel desaparishon di e merkansia aki.

Ehèmpel: den e depósito di duana di gerente X na Boneiru tin merkansia depositá ku ta pertenesé na empresario Y na Venezuela. Ta kibra drenta den e depósito di X. Ta resultá ku a hòrta un parti di e merkansia di Y. E ora ei Duana Hulanda Karibense lo dirigí su mes na X pa pago di e impuesto di importashon ku ta debe pa motibu di e desaparishon.

Depósito di Duana será

E término ‘será’ ta nifiká ku Duana ta vigilá e depósito di duana. Ta nifiká ku ta papia di siere resíproko, loke ta nifiká ku tantu e gerente di e depósito komo Duana ta sera e akseso na e espasio.

Ora habri e depósito, por ehèmpel pa traha eiden òf pa depositashon òf despacho di merkansia, semper tin un ámtenar di duana presente na esaki pa supervisá. Na un depósito di duana será Duana tambe lo mantené un kuenta di e stòk. For di e kuenta aki ta resultá kua merkansia tin depositá den e depósito.

Kiko ta un depósito di duana habrí?

E término ‘habrí’ ta nifiká ku Duana no ta vigilá e depósito di duana. E gerente ta liber pa depositashon i despacho di merkansia den e depósito i pa traha eiden. Naturalmente e aktividatnan aki ta mará na deklarashonnan na duana i pèrmit di Duana.

E atministrashon i organisashon atministrativo (ao, su abreviatura na hulandes) di e gerente di e depósito ta forma e base pa e supervishon di duana na un depósito di duana habrí, fuera di e deklarashonnan di duana. Naturalmente tin eksigensianan na vigor ku e atministrashon i ao mester kumpli kuné.

Kondishonnan pa maneho di un depósito di duana

Pa maneho di un depósito di duana e siguiente kondishonnan ta na vigor:

• e esfuerso di Duana relashoná ku supervishon mester kuadra ku e importansha ekonómiko di establesimentu di e depósito;
• e inspektor a aprobá e espasio di depósito òf e tereno i a otorgá un  pèrmit pa maneho;
• e gerente ta establesé na Hulanda Karibense;
• e gerente a paga un bòrg kontinuo pa e merkansia depositá, espesialmente serka un depósito di duana habrí;

Kondishonnan pa depósito di merkansia ku a klar en

Depositashon i despacho di merkansia for di e depósito di duana mester ta basá riba un dokumento di duana. Pa medio di e dokumento aki tambe ta duna pèrmit pa sea depositashon òf despacho.

Depósito pa un tempu indefiní

Den un depósito di duana por depositá e merkansia pa un tempu indefiní, a ménos ku e inspektor a stipulá algu otro den e pèrmit.

Trato di merkansia depositá

Markansia depositá den un depósito di duana ta keda den e estado den kua a trese nan. Riba petishon por eskrito di e gerente di e depósito di duana i ku pèrmit di e inspektor por duna e merkansia tratamentu. E tratamentu mester ta relashoná ku:

• mantené e merkansia den bon estado;
• drecha presentashon di e merkansia;
• drecha e kalidat komersial;
• preparashon pa distribushon òf rebendementu.

Depósito merkansia for di merkado liber

E inspektor por pèrmiti pa depositá merkansia ku ta prosedé di merkado liber den e depósito di duana. E ora ei tin prekoushonnan kontra abusu na vigor.