Deklarashon di duana

Destinashonnan di duana pa kua por entregá un deklarashon di duana

Den e Douane en accijnswet BES (Lei di Duana i akseins BES) pa merkansia di klar en e siguiente destinashonnan di duana ta inkluí :

• importashon;
• importashon temporal;
• transporte ku ta sigui;
• depósito di duana òf depósito di komèrsio i servisio (HDE)
• perfekshonamentu aktivo;
• tránsito, direkto sin trasborde òf ku trasborde;
• importashon ku almasenamentu den un lugá pa merkansia suheto na akseins (AGP).

Pa bienes ku ta riba merkado liber na Hulanda Karibense:

• eksportashon.

Relashoná ku e parti aki, na e parti Destinashonnan di duana ta duna un splikashon breve di e diferente destinashonnan.

Entregá deklarashon duana

Ku un deklarashon di duana, pa Duana ta bira kla ki destinashon bo ke duna na e merkansia. Segun e destinashon tin konsekuensha mará na e deklarashon, manera e pago di impuesto di importashon (ora di importashon). Klaro ku por pasa tambe ku komo konsekuensha di e deklarashon netamente no tin nodi di paga impuesto di importashon. Esaki ta pasa por ehèmpel ora e merkansia ta destiná pa almasenamentu den un depósito di duana. Kada persona ku por mustra Duana e merkansia i mustra tur dokumento ku ta nesesario pa sigui e destinashon di duana ei por hasi e deklarashon.

Di ki manera mi ta hasi un deklarashon di duana?

E Douane en accijnswet BES (Lei di Duana i akseins BES) ta trese dilanti ku ta entregá deklarashon di duana elektrónikamente serka Duana. Solamente den kaso eksepshonal por hasi e deklarashon di otro forma (espesialmente por eskrito òf sigun e prosedura simplifiká). P’esei pa hasi deklarashon di duana bo ta usa e aplikashon Asycuda World i eiden e módulo ‘declarations’.

Den kua idioma mester hasi un deklarashon di duana?

Den e Douane en accijnswet BES (Lei di Duana i Akseins BES) tin stipulá ku ta hasi e deklarashon di duana na hulandes.

Kiko mi mester yena ora di hasi un deklarashon di duana?

Ta yena e deklarashon di duana sigun e instrukshonnan ku e inspektor di Duana Hulanda Karibense a redaktá. Bo ta haña e instrukshonnan aki den e Handleiding Enig document (Manual Dokumento so).

Kon mi ta splika na Duana pa kua destinashon di duana mi ta hasi mi deklarashon?

Den e deklarashon bo ta menshoná den hòki 1 e tipo di deklarashon di duana, i den hòki 37 e kódigo di areglo. Komo konsekuensha di e menshonnan pa Duana Hulanda Karibense mes ora ta kla pa kua destinashon di duana bo a entregá bo deklarashon, inkluso detayenan denter di e destinashon di duana ei.

Unda mi ta haña e kódigonan ku mester yena den hòki 1 i hòki 37?

E tipo di deklarashon den hòki 1 ta konsistí di e lèternan IM (importashon) òf EX (eksportashon), siguí pa un sifra.

Hòki 37 (kaminda ta menshoná e kódigo di areglo) ta konsistí di dos parti di un hòki. Den e promé parti di hòki ta menshoná si ta trata di importashon, eksportashon, etc, inkluso e posibel areglo di duana ku ta bini promé. Esaki ta un kódigo ku semper ta konsistí di 4 sifra. E promé posishon di e kódigo aki semper ta igual na e sifra menshoná den hòki 1. Den e di dos parti di hòki ta menshoná e spesifikashon di e tipo di deklarashon. Esaki ta un kódigo ku ta konsistí di 3 sifra i ta yam’é e kódigo di prosedura di deklarashon (APC).

Ehèmpel:

Bo bienes di mudansa ta den un depósito temporal. Bo ke importá e bienes di mudansa ku eksonerashon di impuesto di importashon i ta entregá un deklarashon di duana pa esaki. E ora ei bo ta menshoná den hòki 1: IM 4 (4 = importashon definitivo). Den hòki 37 den e promé parti di hòki bo ta menshoná: 4000, i den e di dos parti di hòki 035.

Dor di e menshonnan aki e sistema di deklarashon di Duana Hulanda Karibense lo no kobra impuesto di importashon.

Por aklará e struktura di e kódigonan den hòki 1 i hòki 37 mas aleu?

E kódigo den hòki 1 ta indiká e destinashon di duana. Esaki ta konsistí di IM (importashon) òf EX (eksportashon), siguí pa un sifra. E promé posishon di e kódigo di areglo di 4 sifra den hòki 37 semper ta igual na e sifra ku ta menshoná den hòki 1. E delaster 3 posishon di e kódigo di areglo ta forma e asina yamá kódigo di prosedura di deklarashon (APC).

Ehèmpel:

Bo ke entregá un deklarashon di duana pa bienes di mudansa, ku  eksonerashon di impuesto di importashon. E ora ei bo ta menshoná den hòki 1: IM 4 (4 =importashon), i den hòki 37: 4035.

E APC pa importashon di bienes di mudansa ku eksonerashon di impuesto  di importashon ta 035. Komo ku bo ta usa e kódigonan aki den e hòkinan 1 i 37, pa e sistema di deklarashon di Duana Hulanda Karibense mesora ta kla ku esaki ta importashon di bienes di mudansa i lo no kobra bo impuesto di importashon, sigur no ABB.

Proseduranan simplifiká

Ora di hasi un deklarashon di duana e siguiente proseduranan simplifiká ta posibel:

• e deklarashon no kompleto;
• e deklarashon simplifiká.

Kiko ta un deklarashon no kompleto?

Den situashonnan spesial e inspektor di Duana Hulanda Karibense por pèrmití ku ta entregá un deklarashon, mientras ku esaki no ta kontené tur dato rekerí òf na kua no a aneksá tur dokumento nesesario.

Kiko ta un deklarashon simplifiká?

E inspektor di Duana Hulanda Karibense por pèrmití pa un dokumento komersial òf atministrativo bini kompletamente òf parsialmente na lugá di un deklarashon di un òf mas dato den e deklarashon ei.

Si e dokumento komersial òf atministrativo parsialmente bini na lugá di un deklarashon òf di mas dato den e deklarashon, bo mester hasi un deklarashon adishonal. Ku esei bo ta duna e datonan rekerí pa kompletá e deklarashon pa tal destinashon di duana.

Tantu pa e deklarashon no kompleto komo esun simplifiká ta konta ku por pèrmitié un bia, pero ku e pèrmit tambe por tin un karakter di durashon largu.

Pa e proseduranan simplifiká ta konta:

• ta entregá e petishon pa aplikashon por eskrito serka inspektor (Duana Hulanda Karibense, tim Servisio na kliente, pa e informashon di adrès wak bou di kontakto);
• den e petishon ta indiká si ta trata di un aplikashon di un bia òf un aplikashon ku ta sigui kana;
• ta eksigí un bòrg.

E inspektor ta determiná si por hasi e deklarashon no kompleto òf esun simplifiká i bou di kua kondishonnan adishonal.