Suministro di servisio

Lugá suministro servisio

Ora ta trata di un servisio, e lugá kaminda ta duna e servisio tambe ta di importansia. E servisio ta suheto na ABB solamente si e servisio ta tuma lugá denter di BES. Pues ta di importansia pa determiná si ta duna un servisio na e islanan BES sí òf nò. Loke ta konta ora di determiná na unda ta duna un servisio:

• un regla prinsipal pa empresario na BES;
• un eksepshon riba e regla prinsipal aki;
• un regla general pa empresario no na BES;
• un kantidat di eksepshon riba e regla general.

Kiko ta e regla prinsipal pa empresario di BES pa servisio?

Servisio duná pa empresario di BES, ta hasí na e isla BES kaminda esun ku ta duna e servisio mes ta stablesé. Empresario di BES ta empresario ku ta biba i/òf ta stablesé na e islanan BES i ta duna servisio na kliente ku ta biba i/òf ta stablesé na e islanan BES.

Ehèmpel:
Un kompania di servisio di limpiesa stablesé na Sint Eustatius ta haña un enkargo di un empresario stablesé na Sint Eustatius pa limpia su pakus. Pa dunamentu di e servisio (limpia), ta konsiderá e kompania di servisio di limpiesa un empresario di BES. Ta duna e servisio na Sint Eustatius.

Un kompania di servisio di limpiesa stablesé na Sint Eustatius ta haña un enkargo di un empresario stablesé na Saba pa limpia su pakus. Pa dunamentu di e servisio (limpia), ta konsiderá e kompania di servisio di limpiesa un empresario di BES. Ta kobra impuesto riba e servisio na Sint Eustatius.

Kiko ta e eksepshon riba e regla prinsipal?

Pa un kantidat di servisio no ta konsiderá e empresario di BES komo empresario di BES. E or’ei ta trata di:

• otro servisio ku esnan menshoná den e regla general; Splikashon: aki bo mester pensa na dunamentu di servisio na kliente ku no ta biba ni ta stablesé na e islanan BES, por ehèmpel un turista.
• servisio na un establesimentu permanente stablesé pafó di e islanan BES di un empresario. Ehèmpel: Un ofisina di abogado ademas di e ofisina prinsipal na Boneiru tin un ofisina sekundario na Kòrsou. E ofisina sekundario na Kòrsou ta un establesimentu permanente. E ofisina di abogado ta duna enkargo na un kompania ku ta fèrf kas stablesé na Boneiru pa fèrf e ofisina prinsipal, pero tambe e ofisina sekundario na Kòrsou. Pa fèrfmentu di e ofisina prinsipal e kompania ku ta fèrf kas ta empresario di BES, pero pa fèrfmentu di e ofisina sekundario e kompania ku ta fèrf kas no ta un empresario di BES.
• servisio ku e empresario di BES ta duna na un establesimentu permanente di su kompania pafó di e islanan BES; Ehèmpel: Un ofisina di abogado, ademas di e ofisina prinsipal na Boneiru, tin un ofisina sekundario na Kòrsou. E ofisina sekundario na Kòrsou ta un establesimentu permanente. Pa e servisio ku e ofisina di abogado ta duna for di e ofisina sekundario, no ta konsiderá ku e ta un empresario di BES.

Kiko ta e regla general pa empresario ku no ta di BES ora di servisio?

Ora di servisio duná pa empresario ku no ta di BES nos ta hasi distinshon entre servisio business-to-business (B2B) i servisio business-to-consumer (B2C). Un servisio B2B ta un servisio hasí na un otro empresario (no stablesé na e islanan BES). E ora ei ta kobra impuesto riba e servisio einan kaminda e empresario ku ta kumpra e servisio aki ta biba i/òf ta stablesé.

Ehèmpel:
Un empresa stablesé na Boneiru ta service èrko. Si service èrko di un empresa ku ta stablesé na Kòrsou, e lugá di servisio ta Kòrsou. Un servisio B2C ta un servisio duná na un persona privá (ku no ta biba na e islanan BES). Ta duna e servisio aki einan kaminda esun ku ta duna e servisio ta biba i/òf ta stablesé.

Ehèmpel:
Un barbero stablesé na Saba ta kòrta kabei di un turista merikano. Ta duna e servisio aki na Saba.

Paga tinu: Riba e reglanan aki ta eksistí varios eksepshon. Lo bai muchu leu pa splika esaki na plaka chiki riba e website aki. Pa esaki bo por konsultá e Manual Algemene bestedingsbelasting.