Suministro di merkansia & servisio

Un ehèmpel di un kombinashon di suministro di merkansia i servisio

Un doño di un restorant ku ta bende un kuminda take-out, ta suministrá un merkansia. No mester kobra ABB riba e suministro aki, pasobra e doño di e restorant no ta un produktor.

Evaluashon kombinashon di suministro di merkansia i servisio

Ora di kombinashon di suministro di merkansia i servisio, pa evaluá si ta trata di un suministro i un servisio, un servisio òf diferente servisio, bo por apliká e siguiente puntonan di salida:

• Si e prestashon ta konsistí di un seri di elemento i akshon, e or’ei mester tene kuenta ku tur sirkunstansia;
• Mester konsiderá kada prestashon (suministro òf servisio) apart i independientemente. En prinsipio, esei ta konta tambe pa kada un di e prestashonnan ku ta forma parti di un prestashon kompuesto. Pero si, papiando ekonómikamente, den bista di e konsumidó ta hasi ún prestashon, no mester separá esaki for di otro di un forma artifisial. Por ehèmpel, ta konsiderá montage di partinan ku ta usa ora di service un outo komo un servisio;
• Pa e konsiderashon si ta trata di ún òf mas prestashon, e echo ku ta kobra ún preis no ta desisivo. Si ta kobra ún preis fiho sin importá si ta hasi uso di e prestashonnan sekundario ku a ofresé sí òf nò, esaki lo pone mas lihé ku ta konsiderá e prestashonnan sekundario komo prestashonnan adishonal. Ehèmpel: Un empresario ta hür outo ku kliente. Den e preis di hür di e outo tambe ta inkluí un mapa di kaya. Ta kobra un preis pa tur kos. Awor aki por distinguí dos prestashon, esta e hürmentu (=servisio) i e suministro di e mapa di kaya (= merkansia). E mapa di kaya no ta na benta apart i, komo prestashon adishonal, lo hasi e prestashon prinsipal (=hürmentu) mas atraktivo;
• Ora di un prestashon kompuesto, e partinan más karakterístiko di e prestashon ei ta determiná si por karakterisá e prestashon òf e total komo ún suministrashon òf servisio, i kon mester kualifiká e prestashon ei, den bista di e konsumidó. Ehèmpel: kome un kuminda na un restorant. Ta konsiderá e prestashon komo ún servisio;

Prestashonnan adishonal ta sigui e kualifikashon di e prestashon prinsipal na kua nan ta supordiná. Prestashon adishonal ta prestashon ku pa e kliente en general no ta forma un meta riba su mes i ta hasi e prestashon prinsipal mas atraktivo. Un prestashon adishonal tambe por ta un forma pa probechá más tantu posibel di un otro prestashon. Einan ta trata na prestashonnan ku ta hasi huntu ku un otro prestashon (den ún transakshon) i tin un influensia chikí riba e preis total di e transakshon en kestion, i ku e mesun suministradó ta hasi.

Un ehèmpel más di un kombinashon di suministrashon di merkansia i servisio

E accountant ku ta redaktá un kuenta anual i ta fiha esaki den un rapòrt. E accountant ta suministrá un servisio. Aki ta trata di un servisio di accountancy, e rapòrt riba papel ta solamente e dokumentashon/emboltura di e servisio.

Duda?

E evaluashon si mester konsiderá un prestashon komo un suministro i un servisio, un servisio òf diferente servisio, por ta fèrfelu. Si bo tin duda, bo por tuma kontakto ku Belastingdienst.