Suministro di merkansia
E punto di salida den kaso di suministro di merkansia ta ku mester trata di suministro di merkansia na e islanan BES pa un produktor. Nos ta duna un splikashon kòrtiku di e palabranan ku lèter diki.
Merkansia
Merkansia ta tur kos tangibel, pero tambe awa, koriente, gas, i kos paresido. E lugá di suministro di merkansia tambe ta di importansia. Solamente ora e suministro ta tuma lugá denter di e islanan BES, por papia di un suministro kargá ku impuesto. E lugá di suministro ta aya kaminda e merkansia ta situá na momentu di suministro.
Ehèmpel:
Un desaroyadó di proyekto ku ta konstruí bibienda na Boneiru (riba tereno propio) i ta bende esakinan, ta suministrá un merkansia na Boneiru. E bibienda ta situá na Boneiru na e momentu di suministro.
Un desaroyadó di proyekto ku ta konstruí bibienda na Kòrsou (riba tereno propio) i ta bende esakinan, ta suministrá un merkansia na Kòrsou. E suministro no ta tuma lugá denter di e islanan BES i p’esei tampoko no ta kargá ku ABB.
Pero si mester manda òf transportá e merkansia pa suministro, e ora ei e lugá di suministro ta einan kaminda e transporte òf e ekspedishon ta kuminsá.
Ehèmpel:
Un produktor di kozein stablesé na Boneiru ta traha kozein riba enkargo di un kontratista stablesé na Saba. Ta transportá e kozeinnan pa Saba en konekshon ku e suministro. E lugá di suministro ta Boneiru. Paga tinu: Riba e suministro aki, na Boneiru e nultarief (tarifa sero) ta aplikabel. Pero pa e importashon na Saba sí tin ku paga ABB!
Produktor lokal
Un produktor ta un empresario ku ta produsí merkansia uzando materia prima òf aditivo òf produkto semi akabá, prinsipalmente destiná pa empresario. E ora ei, e produkshon di e merkansia i e benta di esaki mester tuma lugá na un espasio ku ta mueblá pa más ku 50% i ku ta usa pa benta ku otro empresario.
Ehèmpel:
Un empresario stablesé na Boneiru den su fábrika ta traha mueble i ta bende esakinan prinsipalmente ku otro empresario. E fabrikadó di mueble awor ta konsiderá komo produktor. Di pursi, e fábrika ta un espasio ku pa más ku 50% ta mueblá, destiná i usá pa traha meubel i bende esakinan ku otro empresario.
No ta konsiderá un hoyero ku e mes ta traha i bende hoya na su pakus komo produktor. Di pursi, un pakus no ta un espasio ku ta mueblá, destiná i usá pa benta ku otro empresario, sino yùist ku persona privá.