Obligashonnan atministrativo

Derecho riba eksonerashon di obligashonnan atministrativo

Bo tin derecho riba eksonerashon di obligashon atministrativo si bo ta kumpli ku e siguiente kondishonnan:

• Bo tin un negoshi individual òf e empresa ta un mankomunidat di persona natural, manera un sosiedat, un kompania kolektivo òf un sosiedat di hòmber/muhé (pareha kasá/ no kasá) i bo ta situá na Boneiru, Sint Eustatius i Saba i;
• Bo volúmen di benta (sin inkluí ABB) pa aña kalendario ta ménos ku USD 10.000 i;
• Bo ta hasi solamente servisio i/òf suministro sin kobra impuesto i;
• Bo ta warda e dokumentonan atministrativo di un manera bon reglá.

Pa bin na remarke pa eksonerashon di obligashonnan atministrativo bo ta entregá un petishon por eskrito (por download e petishon di eksonerashon aki) serka B/CN. Despues di e evaluashon bo ta risibí un disposishon den kua ta informá bo si bo ta bin na remarke pa eksonerashon ABB, sí òf nò.

Kiko ta e eksigensianan ku e atministrashon mester kumpli kuné?

E empresario mester hiba un atministrashon ku ta:

• tene nota di e suministronan i servisionan hasí dor di dje i p’e;
• tene nota di e importashon i eksportashon ku e ta hasi di biennan; 
• tene nota di otro informashon ku ta importante pa imposishon di ABB;
• diariamente ta tene nota di e gastunan i resibunan relashoná ku suministronan i servisionan hasí dor di dje i p’e;
• e ta hiba su tenementu di buki en relashon ku e volúmen di benta di un manera asina kla i transparante ku ta posibel pa establesé ku e imposishon di impuesto ta tuma lugá di e manera korekto i ku ta posibel pa establesé e ABB ku debe pa un periodo di impuesto fiho;
• e ta warda kopianan di faktura entregá n’e i dor di dje.

Pues mester mantené un atministrashon regularmente i mester warda datonan di moda ku bo ta kapas pa hasi e deklarashonnan di impuesto nesesario na tempu i B/CN tin sufisiente posibilidat pa kontrolá eksaktitut di e deklarashonnan di impuesto. Si e atministrashon no ta kumpli ku e eksigensianan, esei por tin komo resultado ku B/CN mester hasi un balorashon di e montante ku debe na impuesto.

Paga tinu! Bo tin e obligashon pa warda bo atministrashon pa shete aña. Tur informashon ku bo ta registrá tokante bo empresa ta parti di bo atministrashon. Esaki ta enserá entre otro agèndanan (digital), korespondensia, tráfiko di e-mail, kontraktnan etc. Semper bo mester warda e asina yamá datonan básiko di bo atministrashon pa shete aña.

Ta obligatorio pa duna faktura?

Empresario ku ta kai bou di e ABB, pa nan suministronan di biennan i/òf e servisionan hasí pa terser partinan tin e obligashon pa duna e terser parti(nan) aki un faktura. E ora ei bo mester warda un kopia di e faktura ku bo a saka den bo atministrashon.

Bo mester saka e faktura pa mas tardá denter di diessinku dia despues di e luna den kua e suministro i/òf e servisio ta hasí. Si abo i e empresario ku ta hasi uso di bo servisio ta kumbiní ku lo hasi e pago adelantá òf den partinan, kada bes bo mester traha i saka un faktura na momentu di un pago (parsial).

Ku kua eksigensianan un faktura mester kumpli?

E eksigensianan pa e faktura ta dependé di e montante ku ta kobra riba e faktura. Si e montante riba e faktura na momentu di un suministro di biennan ta mas haltu ku USD 5.000 i/òf ora di ehekushon di un servisio ta mas haltu ku USD 200 tin mas eksigensia ta konta pa e faktura. Si e montante riba e faktura na momentu di suministronan ta mas abou ku USD 5.000 i/òf ora di ehekushon di un servisio ta mas abou ku USD 200, ta sufisiente pa duna un faktura simplifiká. Akibou bo por mira e eksigensianan di e faktura i di e faktura simplifiká.

Mester menshoná e siguiente informashon riba e faktura:

• e nòmber (di e empresa), e datonan di adrès i e number di registrashon (number di crib) di e empresario ku ta ehekutá e prestashon;
• e nòmber (di e empresa) i e number di registrashon (number di crib) di esun pa ken ta hasi e prestashon;
• un deskripshon kla di e índole di e kantidat di e biennan suministrá;
• un deskripshon kla di e trabounan òf e servisio hasí;
• e fecha ku ta hasi e entrega, e trabou òf e servisio;
• number di faktura sin interupshon i un fecha;
• e pago i, si debe ABB pa e prestashon, e montante di e ABB.

Mester inkluí e siguiente datonan riba e faktura simplifiká:

• e nòmber (di e empresa) i e datonan di adrès di e empresario ku ta ehekutá e prestashon;
• un deskripshon kla di e índole i e kantidat di e biennan entregá;
• un deskripshon kla di e trabou òf e servisio hasí;
• e fecha ku ta ehekutá e entrega, e trabou òf e servisio;
• number di faktura sin interupshon i un fecha;
• e pago i, si debe ABB pa e prestashon, e montante di e ABB.