Eksonerashonnan ABB

Biennan i/òf servisionan eksonerá di ABB

E siguiente suministronan di biennan i/òf servisionan na Boneiru, Sint Eustatius i Saba ta eksonerá di ABB. Pa fasilitá lesamentu tin biaha a abreviá e teksto tokante eksonerashon.

• Suministro di nesesidatnan básiko, te kon leu nan ta parti di kapítulonan di e sistema harmonisá menshoná den artíkulo 3.1 insiso dos, parti a, di e ‘Douane- en Accijnswet BES’ (Lei di Duana i Akseins BES) ku lo designá pa medio di un areglo ministerial. Ta trata di e siguiente biennan: lechi i produkto di lechi, webu di para, miel natural i otro produkto komibel di orígen di animal, berdura, mata, rais, batata, fruta, kaska di fruta sítriko i di milon, kòfi, te, maté (un te di yerba), speserei, grano, produkto di industria di hariña, malta, fékula, inulina (un tipo di fibra natural), glüten di trigu, vèt, zeta i produkto derivá di nan, vèt i was komestibel prosesá, suku i kos di boka dushi, preparashonnan di grano, di hariña, di fékula òf di lechi i bolo; 
• Suministro di transporte públiko di persona i di servisionan di bùs di skol riba kaya (taksi, bùs etc.) E eksonerashon ta aplikabel pa i limitá na transporte di persona di punto ‘A’ pa punto ‘B’;
• E servisionan hasí dor di hòspital i laboratorio pa eksámen médiko, pero tambe e servisionan ku dòkter, dentista, tékniko di djente, enfermero/a i partera, fisioterapista i terapista di ehersisio, kiropraktor, logopedista, dietista, podoterapeuta i sikólogo (i te kon leu nan ta diplomá i kompetente) ta ehersé komo tal;
• Suministro di remedi pa uso humano riba reseta di un médiko den e sentido di e ‘Besluit geneeskunde BES’ (Desishon medisina BES);
• Suministro di medio artifisial i medio ouksiliar médiko;
• Suministro di enseñansa no komersial. Aki ta trata di enseñansa finansiá i organisá dor di gobièrnu i enseñansa di formashon general suministrá dor di negoshante sin fin di lukro, formashon vokashonal, pero tambe enseñansa di músika, baile, drama i arte plástiko suministrá na personanan bou di 21 aña. Bou di enseñansa tambe ta kai ‘bijles’, lès pa trein tèntamen òf eksámen, i eksaminá hende den e konteksto di e enseñansa ei, komo tambe suministronan i servisionan estrechamente relashoná ku e enseñansa ei. Enseñansa ku un karakter di tempu liber (por ehèmpel lès di kore outo i motosaikel) i/òf enseñansa ku e propósito di atkirí abilidatnan den e esfera di bida personal no ta eksonerá;
• Suministro di pakete postal ku e portador di e lisensia tin e obligashon di transportá a base di loke a stipulá den i konforme artíkulo 2, insiso dos, di e ‘Wet post BES’ (Lei di pòst BES);
• Suministro di awa, koriente i gas dor di kompania di awa, koriente, i gas komo tambe suministro di kombustibel pa generashon di energia pa e negoshinan ei;
• Entrega i instalashon di pènel solar i kolektor solar no integrá i pènel i kolektor solar integrá ku ta funshoná komo material pa dak, kon tal ku ta entregá i instalá nan serka un tipo di negoshi ku no ta un negoshi di koriente; meskos ta konta pa produkto designá via un areglo ministerial ku ta destiná pa ta konektá riba nan, tambe ora ta suministrá i instalá nan apart;
• Suministro i instalashon di turbina di bientu, kon tal ku ta suministrá i instalá nan serka un tipo di kompania ku no ta un kompania di koriente; meskos ta konta pa parti diseñá òf adaptá espesialmente pa turbina di bientu, asta ora ta suministrá i instalá nan apart;
• Entrega di un propiedat inmóbil, un edifisio ku no ta un edifisio resien konstruí òf un parti resien konstruí di un edifisio i e tereno korespondiente, si ta debe impuesto di traspaso relashoná ku e entrega ei;
• Seguro di bida, seguro médiko i reaseguro dor di kompanianan di seguro i e servisionan dor di intermediario serka seguro. Bou di seguro di bida ta komprondé un seguro ku tin komo propósito (práktikamente) únikamente pa suministrá un òf mas término di pago i ku ta dependé di bida di e asegurado, inkluso seguronan di entiero, sin konta e manera di pago;
• Hürmentu di kamber di hotèl i apartamento si ta debe impuesto riba turismo a base di un ordenansa insular;
• Servisionan ku ta konsistí di duna oportunidat pa partisipá den wega di kasino, loteria, raspaditu, lòt di number, weganan di number, bingo i weganan similar si ta debe impuesto riba wega di azar;
• Hasimentu disponibel di préstamo di plaka i e servisionan relashoná ku balornan, biyete di banko i biyete di moneda (ku eksepshon di esnan ku no ta medio di pago legal i/òf ku tin balor di kolekshon). Bou di balornan no ta komprondé dokumento ku ta representá biennan, derechonan riba propiedat inmóbil, e derechonan real ku ta duna e derechohabiente e outoridat pa hasi uso di un propiedat inmóbil, i sertifikado di kompartí i akshon di kua e poseshon segun derecho òf en realidat ta duna derecho riba propiedat òf derecho pa disfrutá di un propiedat inmóbil òf di un parti di dje; 
• Suministronan di biennan i suministro di servisionan na kònsùl profeshonal i otro representantenan profeshonal di potensia strañero, komo tambe e ámtenarnan ku ta kai bou di nan i e personanan ku ta biba den nan kas i ku ta den nan empleo, tur kon tal ku nan ta strañero i no ta empresario na Boneiru, Sint Eustatius i Saba i bou di e kondishon di resiprosidat;(Paga tinu! Pa e eksonerashon aki bo mester hasi un petishon na B/CN)
• E servisionan di transporte pa medio di avion òf barku riba laman;
• E servisionan hasí den un área di laman òf riba tereno di un aeropuerto na Boneiru, Sint Eustatius i Saba relashoná ku biennan i servisionan ku ainda no a importá drentando einan i saliendo for di einan na benefisio di barkunan i avionnan ku ta usa komo medio di transporte públiko pa transporte di personanan òf di biennan (inkluso avion di guera), pero ku eksepshon di boto pa rekreashon;
• Suministronan di kombustibel, lubrikante i otro líkido destiná pa propulsá, lubrikashon i otro uso tékniko na bordo di bapor di laman i avion, komo tambe suministro di biennan destiná pa abastesementu di bapor di laman ora di sali (ku eksepshon di bapor pa peska na kosta), boto di salbabida, bapor pa asistensia riba laman, bapor di guera ku tin komo destinashon un haf òf lugá di ankra pafó di Boneiru, Sint Euatatius i Saba, i avion;
• E servisionan hasí komo tal dor di un empresario establesé den un depósito di komèrsio i servisio;
• Suministronan di biennan na un empresario establesé den un depósito di komèrsio i servisio, te kon leu ta usa e biennan ei na benefisio di biennan i aktivonan di e empresario ei ku ta presente den e depósito ei;
• Servisionan suministrá na un empresario establesé den un depósito di komèrsio i servisio, únikamente te kon leu ta suministrá e servisionan ei na benefisio di e aktividatnan ku ta legalmente permití den depósito di komèrsio i servisio òf na benefisio di su biennan i aktivonan presente den e depósito ei;
• Suministro di kuido i enfermeria na persona atmití den un instituto, tambe suministro di kuminda i bibida, remedi i ferbant na e personanan ei, tambe servisionan dor di kasnan di kuido i di ansiano te kon leu e servisionan aki tin di haber ku alohamentu i kuido di e habitantenan;
• Hürmentu ku partikular ku ta biba na Boneiru, Sint Eustatius i Saba di propiedatnan inmóbil mueblá, destiná i den uso komo residensia permanente;
• Suministro di biennan i ehekushon di servisionan pa proyektonan te kon leu esakinan den kuadro di yudansa mutuo ta bin pa kuenta di Aruba, Kòrsou òf Sint Maarten, òf den kuadro di ayudo pa desaroyo ta bin pa kuenta di organisashonnan internashonal;
• Servisionan manera referí na dje den artíkulo 7.1 frase di apertura, parti a, di e ‘Belastingwet BES’ (Lei di Impuesto BES), si ta debe impuesto di traspaso pa ehekushon di e servisionan. Aki ta trata di prestashonnan ku pa e ABB ta kualifiká komo servisio i ku pa e impuesto di traspaso ta kai bou di e konsepto di ‘traspaso’ (ku mester paga impuesto riba dje): servisio konsistiendo di establesimentu, renunsia i terminashon di usufrukto, di uso i residensial, servidumbre, èrfpagt, edifisio/konstrukshon (opstal), hürnan di tereno, sea ku ta debe nan den plaka, sea in natura i akshonnan similar relashoná ku propiedatnan inmóbil òf e derechonan na kua nan ta someté. Eksonerashon di ABB no ta aplikabel si pa kualke motibu no ta imponé impuesto di traspaso.