Traha produkto suheto na akseins
Pa produkto suheto na akseins ta konta ku na Hulanda Karibense únikamente por produsí nan den lugá pa kua Duana a duna un pèrmit. Un lugá asina yama un accijnsgoederenplaats (AGP). Produkshon di produkto suheto na akseins pafó di un AGP, pues sin pèrmit di Duana, ta estriktamente prohibí.
Trahamentu di produkto suheto na akseins
Paga tinu: Trahamentu di un produkto suheto na akseins den un AGP tambe ta pèrmití solamente si e AGP ta designá pa e produkto ku ta bai traha. Den un AGP pa serbes por ehèmpel no por traha bibida alkohóliko.
Si despues ku traha e merkansia ta saka nan for di e AGP (e lugá di produkshon/almasenamentu) pa uso den e pais (e término legal pa esaki ta despacho), e ora ei ta surgi un deber pa paga akseins. Aki ta konta meskos ku ora di importashon, esta ku na Boneiru e despacho di tur produkto suheto na akseins ta suheto na un akseins. Pa Saba i Sint Eustatius ta konta ku únikamente e despacho di gasolin ta suheto na akseins.