Paga bèk

Den kua kaso mi por entregá un petishon pa haña bèk ABB i/òf akseins pagá ora di importashon?

1. Merkansia ku kua a kometé un eror ora di hasi deklarashon
2. Pa motibu ku ta rasonabel (ABB, artíkulo 6.21 Belastingwet BES)
3. Merkansia suheto na akseins ku ta bai eksportá

1. Merkansia ku kua a kometé un eror ora di hasi deklarashon

Ta trata di e siguiente situashonnan:

• No tabatin deber pa paga, òf e suma ku bo a paga ta mas haltu ku loke bo mester a paga; Ehèmpel: bo a usa un tasa di kambio inkorekto ora di kalkulá moneda stranhero na USD.
• A kibuká ora a indiká ku e merkansia ta pa importashon; Ehèmpel: a indiká ku e merkansia ta pa importashon, pero nan tabata destiná pa tránsito.
• E importador ta nenga e merkansia; Ehèmpel: e importador ta nenga e merkansia pasobra nan tin defekto òf pasobra pa un motibu òf otro nan no ta kuadra ku e stipulashonnan di e kontrakt a base di kua a importá e merkansia.
• E merkansia ta den un situashon spesial; Ehèmpel: a manda e merkansia pa e importador pa kibukashon.

Tin kondishon na vigor pa haña ABB i/òf akseins bèk?

• a. E persona ku a hasi e deklarashon (e deklarante) mester por proba ku un di e situashonnan menshoná ariba ta e kaso.
• b. Den diferente situashon ta konta ku lo mester manda e merkansia ku a importá promé bèk (eksportá) pa e suministrador. Ora di eksportá e merkansia semper lo bo mester entregá un deklarashon pa eksportashon na Duana Hulanda Karibense. Den e kaso aki, paga tinu i informá Duana ku ta netamente e merkansia aki bo ta bai eksportá. Asina Duana por establesé ku ta trata di eksportashon di produkto ku a importá promé. Pasobra si esei no keda establesé, e por nifiká ku ta nenga di paga bèk.
• c. Bo mester entregá e petishon pa pago bèk serka Duana Hulanda Karibense denter di sinku aña despues di hasi e deklarashon pa importashon. 

2. Pa motibunan ku ta rasonabel (ABB, artíkulo 6.21 Belastingwet BES)

Den e Belastingwet BES tin un posibilidat pa pidi pa debolbé ABB ku a paga di mas ora di importashon pa motibunan ku ta rasonabel. Esaki ta un situashon ku no a menshoná promé bou di punto 1.

Si bo ta di opinion ku ta rasonabel pa bo haña ABB bèk, bo por entregá un petishon fundamentá pa pago bèk. E kondishonnan pa e petishonnan bou di punto 1 tambe ta aplikabel riba e petishon aki.

3. Merkansia suheto na akseins ku ta eksportá

Akseins ta un asina yamá impuesto di konsumo. Ora paga e akseins na Ofisina di Impuesto Hulanda Karibense, pero no ta usa e merkansia na Boneiru (tur merkansia suheto na akseins) ni na Saba ni na Sint Eustatius (únikamente gasolin), pasobra ta eksportá e merkansia, den sierto situashon por konsedé pago bèk di akseins. Aki ta konta, dependiendo di e tipo di merkansia suheto na akseins, ku mester a eksportá un kantidat mínimo.

Paga tinu: den e situashon aki un posibel pago bèk tambe ta konta si a traha e produkto suheto na akseins na Hulanda Karibense i a paga e akseins riba un deklarashon di akseins interior.

Informá serka Duana Hulanda Karibense, tim Servisio na Kliente pa e kondishonnan.

Di ki forma mi ta pidi bèk e impuesto di importashon ku a paga dimas?

Pa risibí bèk ABB i/òf akseins ku a paga dimas, bo mester entregá un petishon por eskrito serka Duana Hulanda Karibense. Den e petishon bo ta menshoná e siguiente asuntunan:

• e fecha riba kua i e number di deklarashon bou di kua a importá e merkansia;
• e motibu pakiko ta deseá e pago bèk;
• pa tipo di impuesto riba importashon (ABB, akseins) un kalkulashon di e suma pa risibí bèk.

Bo ta entregá tur dokumentashon relevante pa trata ku e petishon, manera:

• un kopia di e dokumento di importashon;
• e faktura ku a usa ora di importashon;
• korespondensia ku e suministrador di e merkansia;
• un nota di krédito (si ta aplikabel)

Na unda mi mester entregá e petishon pa risibí pago bèk? Bo ta entregá e petishon pa risibí pago bèk serka Duana Hulanda Karibense, tim Servisio na Kliente (wak pa mas informashon bou di kontakto).

Paga tinu: si e importashon a tuma lugá na Saba òf Sint Eustatius, por entregá e petishon tambe na e kantor di Ofisina di Impuesto Hulanda Karibense aya (wak pa mas informashon bou di kontakto). E ofisina aki lo manda e petishon pa e tim duana Servisio na Kliente na Boneiru.

Tin un suma mínimo na vigor pa un petishon pa risibí pago bèk?

E montante na ABB pa paga bèk mester ta por lo ménos USD 8,- .

Ken ta entregá e petishon i na ken ta hasi e pago bèk?

E deklarante (e persona ku a hasi e deklarashon) ta entregá e petishon. E deklarante tambe por outorisá un tersera parti pa entregá e petishon na su nòmber. Despues di aprobashon ta paga e suma ku a paga di mas na impuesto di importashon únikamente na e persona ku a paga e impuesto en kestion promé.

Ehèmpel: un transportista di duana, bou di su mes nòmber i pa su mes kuenta, a hasi e trámitenan di un deklarashon pa impuesto na benefisio di un importador. E importador, ku un outorisashon di e transportista di duana, ta entregá e petishon pa risibí e pago bèk. Si yega asina leu ku ta paga bèk, ta paga esaki na e transportista di duana.