Kòntròl di Duana fruktífero
Den e lunanan tras di lomba Duana a ehekutá diferente kòntròl kaminda a topa i konfiská bestia òf mata ku ta riba e lista di e Kombenio Internashonal di Komersio di Espesienan Protehá (Convention on International Trade of Endangered Species, CITES). CITES ta e kombenio ku ta regulá, i si ta nesesario, prohibí e komersio internashonal di bestia i mata protehá.
Kabes di karpachi di krokodel Melanosuchus Niger
Riba djárason 3 di aprel a tene un kòntròl riba paketenan ku a yega via FXDC. Aki a hasi uzo di e ‘handheld backscatter’. Esaki ta un aparato ku metikulosamente ta detektá artíkulonan di kontrabanda ku ta skondí den áreanan será òf ku ta entre vários la di material.
Durante di e kòntròl a topa ku e kabes di karpachi di un krokodel. Despues di evaluashon dor di eksperto a konstatá ku ta trata di e kabes di karpachi di un krokodel Melanosuchus Niger ku ta permanesé riba e lista di CITES. E risibidó di e pakete no tabatin e sertifikadonan nesesario di CITES. A konfiská e kabes pa investigashon mas aleu.
Strombus Gigas/Karkó
Durante di un akshon konhunto ku partnernan di kadena riba 23 di yüni, a tene un kòntròl riba un vehíkulo na Kaminda di Lac. Durante di e kòntròl a konstatá ku e baki di e vehíkulo tabata yená ku karni di Strombus Giga, mihó konosí komo karkó. E shofùr a deklará ku huntu ku un otro hòmber a kaba yega for di islanan Aves ku e karkónan i ku e otro hòmber no tabata presente na e momentunan ei. E hòmber no tabatin e papelnan di duana i sertifikadonan di CITES nesesario huntu kuné. A informá e shofùr ku e tabata violá e lei i kombenio di CITES. A konfiská e karkó i destruí esaki mesun dia. Na momento ku a pisa, e karkó a pisa un peso bruto di 1004 kilo.
Bestia/mata CITES
Den e akuerdo di CITES tin regla pa protehá mas o ménos 5.800 tipo di bestia i 30.000 tipo di mata. E ta un akuerdo internashonal na kua Union Oropeo i 184 pais mas ta partisipá. Kua bestia i mata ta protehá i bou di kua kondishon por hasi negoshi ku nan, ta stipulá den CITES. Bou di CITES ta kai bestia òf mata bibu òf morto òf produktonan derivá for di esaki. Pues e reglanan ta konta tambe pa por ehèmpel e kokolishi di karkó, pero tambe pa e koral morto. Remedi i suplemento pa nutrishon por kontené produkto ku ta kai bou di e regulashon di CITES.
Si bo ta plania pa bende òf kumpra un bestia òf mata, chèk e lei i regulashon i no bai ofer pa kompra òf benta si e bendedó no por mustra e dokumentunan rekerí. Asina bo no ta haña bo embolbí den negoshi ilegal di bestia òf mata sin ku bo ke.
Mas informashon tokante negoshi di bestia i mata protehá i tambe pa petishon di dokumentunan di CITES por akudí na a wèpsait di ‘Rijksdienst voor Ondernemend Nederland, www.rvo.nl/onderwerpen/cites.