Notisia18-03-2026 | 15:31

Diesdos (12) aspirante a kuminsá e luna aki ku nan estudio pa bira ámtenar di duana na Duana Hulanda Karibense (Douane Caribisch Nederland). Riba 17 di mart nan a huramentá òf hasi nan promesa, ku kual ofisialmente nan a kuminsá ku e formashon di nuebe (9) luna pa funshonario-C di duana (Taakgerichte C-opleiding). Ku e promoshon nobo aki, Duana Hulanda Karibense ta dal un paso importante den fortifikashon di e supervishon i mantenshon na fronteranan di Boneiru, Sint Eustatius i Saba.

Imágen: © BCN

Formashon pa funshonario-C

E formashon ta tuma lugá na Boneiru i ta konsistí di un kombinashon di teoria i práktika. E estudio ta partí den tres módulo:

  • Módulo di Entrenamentu Profeshonal Integral (IBT) i Agente Outorisá di Polis (BAVPOL);
  • Módulo básiko di téknika profeshonal pa funshonario-C di Duana;
  • Módulo di siña i traha basá riba tarea.

Durante e formashon, e aspirantenan ta haña, entre otro, lès den derecho penal i prosedura penal, formulashon di prosèsferbal i aktuashon profeshonal. Tambe nan ta haña entrenamentu pa kontròl di violensia, detenshon i defensa propio, konosementu di arma i habilidat pa tira.

Ademas nan ta siña traha ku legislashon di duana, inkluyendo e Lei di Duana i Accijnswet BES (Douane- en Accijnswet BES) i e Lei di Impuesto BES (Belastingwet BES). Tambe nan ta siña e leinan spesial riba tereno di seguridat, salubridat, ekonomia i medio ambiente, manera e Lei di Arma di Kandela, Lei di Medikamento, Lei di Opio 1960 BES i regulashonnan di CITES.
Mas aleu, e aspirantenan ta sera konosí ku e proseso di deklarashon di importashon, tarifanan di duana, balor di duana, eksonerashon, ekipahe di biahero i ‘accijns’. Nan ta sigui tambe lès di Hulandes i ta siña traha ku Asycuda World, e sistema ku Duana ta uza pa registrashon di tur merkansia ku ta drenta òf sali.

Nombramentu

Despues ku terminá e formashon ku éksito na desèmber 2026, lo nombra e aspirantenan komo duanero (funshonario-C). Despues di esaki, lo desplegá nan na Boneiru, Sint Eustatius i Saba, kaminda nan lo pone nan konosementu i habilidatnan den práktika.