Supervishon di parti di Duana na Hulanda Karibense ta duna un kontribushon esensial na kombatimentu di kriminalidat ku ta destabilisá, siguridat i protekshon di salubridat públiko i naturalesa. Esaki resultado di supervishon 2025 di Duana Hulanda Karibense ta demostrá, ku mas di 35 resultado konkreto.
Kombatimentu di fluho di plaka ilegal
Na 2025 a registrá 14 deskubrimentu a base di e Lei di Prevenshon di Labamentu di Plaka i Finansiamentu di Terorismo BES (WWFT BES). Tur e deskubrimentunan di WWFT aki a tuma lugá na Boneiru. Na total a topa ku USD 209.545 na plaka efektivo ku no a deklará serka biaheronan. Den mayoria kaso a imponé un but atministrativo, pa motibu ku no a kumpli ku e deber di hasi deklarashon.
Intersepshon di narkótiko
Na 2025 a konstatá 11 deskubrimentu a base di e Lei di Opio BES 1960, kaminda a interseptá entre otro cannabis, hash i XTC. E deskubrimentunan tabata repartí riba Boneiru (9 deskubrimentu, na total: 2.770 gram di cannabis, 59 gram di hash, 7,44 gram di XTC), Sint Eustatius (1 deskubrimentu: 96 gram di cannabis) i Saba (1 deskubrimentu: 0,25 gram di cannabis).
Intersepshon di arma i munishon
Na 2025 a registrá tambe 7 deskubrimentu a base di e Lei di Arma (di kandela) i Munishon BES, partí riba Bonaire (1 deskubrimentu: 1 ‘taser’ i 1 kaha di munishon ku 20 pida), Sint Eustatius (5 deskubrimentu, na total: 3 ‘pepperspray’, 4 ‘lipstick gun’, 1 ‘knuckle’ i 1 ‘stungun’) i Saba (1 deskubrimentu: 1 kaha di munishon di 500 pida).
Protekshon di salubridat públiko i naturalesa
A base di e Lei di Suministro di remedi BES, den kua tin stipulá pa importashon di kua produkto tin mester di un pèrmit, a registrá 4 deskubrimentu. E deskubrimentunan tabata partí riba Boneiru (3 deskubrimentu: a topa ku GafPlus i VitaFer, remedinan ku ta kontené diclofenac) i Saba (1 deskubrimentu: a haña 192 píldora di sildenafil citrato).
Den kuadro di supervishon riba importashon di produktonan di animal prohibí a interseptá na total 186,4 kilo di karni di porko na Boneiru, Sint Eustatius i Saba. Na Boneiru a interseptá ademas a base di Legislashon di Flora i Founa tambe 440 kilo di karkó (un espesie protegé).
Supervishon di duana
Pa medio di un kombinashon di kontrol dirigí ku diferente hèrmènt di kontrol i kolaborashon estrecho ku partnernan di kadena, Duana Hulanda Karibense den 2025 a logra atendé di forma efikas ku riesgonan na frontera.
Duana Hulanda Karibense lo kontinuá ku e aserkamentu akí den 2026, di manera ku e aña akí tambe por aktua efikasmente kontra violashon di lei i regulashon.