Kòntròl marítimo durante edishon 58 di Regatta Bonaire
Djadumingu 5 di òktober 2025 edishon 58 di Regatta Bonaire ta kuminsá. Multidisiplinario Marítimo Hub Boneiru (MMHB), ku diferente partner di kadena ta kai bou di dje, e aña aki tambe lo kontribuí aktivamente na seguridat riba awa durante di Regatta.
Duana, Koninklijke Marechaussee (KMar), Wardakosta, Kuerpo Polisial Hulanda Karibense (KPCN) i Entidat Públiko Boneiru (OLB), lo supervisá i kontrolá kumplimentu ku tur legislashon i regulashon ku ta importante pa kada partner di kadena.
Tambe, e partnernan di kadena lo sostené otro ku ehekushon di nan tareanan durante e evento. Ademas e diferente partnernan di kadena ta manda refuerso èkstra pa posibel asistensia di emergensia.
Supervishon i e kòntròl ta tuma lugá den e awanan entre Kòrsou i Boneiru, rondó di Boneiru i den e bahia di Kralendijk.
Duana
Duana lo supervisá riba tráfiko di merkansia ku ta pasa frontera i sòru pa kumplimentu ku e proseduranan korekto di importashon i eksportashon. Tambe nan lo kontrolá riba presensia di merkansia prohibí.
Koninklijke Marechaussee (KMar)
KMar ta responsabel pa vigilansia di frontera na Boneiru. Nan ta kontrolá e kondishonnan di entrada pa personanan i ta kontribuí na kombatimentu di kriminalidat ku ta pasa frontera.
Wardakosta
Wardakosta lo ehekutá kòntròl riba balides di dokumento di barku manera karchi di registrashon i pèrmit di nabegá. E dokumentonan aki mester ta bálido pa e área di Boneiru. Ademas, Wardakosta ta kontrolá riba e kantidat di persona na bordo di un boto konforme e karchi di inspekshon i ta mantené órden públiko i seguridat.
Kuerpo Polisial Hulanda Karibense (KPCN)
KPCN ta enkargá ku mantenshon di órden públiko i ta duna asistensia kaminda esei ta nesesario.
Entidat Públiko Boneiru (OLB)
OLB ta kontrolá si ta hasi uso korektamente di bui i lugánan pa mara boto. Tambe lo kontrolá ankramentu i lo retirá bui ku ta mará sin outorisashon. Tambe ta ilegal pa transportá persona sin e pèrmitnan nesesario, esaki ta pa sigurá nan bida riba laman. Ku asistensia di wardakosta lo kontrolá riba pèrmit, registro i sertifikado nashonal di seguridat.
MMHB ta pidi atenshon pa subi awa bon prepará i ta konsehá pa aserká e instansianan konserní den kaso di pregunta. Ademas, MMHB ta deseá pueblo di Boneiru i su bishitantenan un Regatta dushi i seif.