Kolaboradónan di Duana Hulanda Karibense ta risibí medaya pa servisio leal i di durashon largu
Djadumingu 18 di mei, 20 empleado di Belastingdienst Caribisch Nederland na Boneiru, Sint Eustatius i Saba a risibí ‘Medaya pa servisio leal i di durashon largu Duana’. Ta otorgá e kondekorashon na empleadonan ku tin 12½, 25, 40 òf te asta 50 aña den servisio di Duana.
Durante un seremonia ofisial, Direktor Maneho Strategia & Internashonal, señora Mechteld Fletcher i Direktor Belastingdienst Caribisch Nederland, señora Claudia Toet respektivamente a hasi entrega di e medayanan i ‘oorkonde’. E empleadonan di duana a risibí nan kondekorashon den presensia di nan famia i sernan kerí.
E kondekorashon ta separá di e asina yamá ‘hubileo di ámtenar di gobièrnu’. Na momentu ku e empleadonan a traha anteriormente na un otro ministerio Hulandes, ta konta tantu e añanan di e otro ministerio i e añanan realmente na Duana huntu. Den kaso di e kondekorashon pa servisio leal i di durashon largu, ta konta solamente e añanan di Duana.
Esaki ta un inisiativa ku a inisiá algun aña pasá na Hulanda i awor a tuma lugá pa promé biaha na Hulanda Karibense. Ku esaki a dal un paso importante den rekonosementu di relashon laboral di durashon largu / hopi aña i dedikashon na Hulanda Karibense.
Direktor di Belastingdienst Caribisch Nederland Claudia Toet: “E medaya aki ta mas ku solamente un muestra di apresio. E ta un homenahe na nos koleganan di Duana ku pa hopi aña a traha ku alma i kurason pa Duana Hulanda Karibense. Nan dedikashon ta e wesu di lomba di nos sosiedat i organisashon, i djadumingu nos a tuma un momentu pa orguyosamente reflehá huntu”.
E medaya pa servisio leal ta un apresio pa tur e añanan di dedikashon i lealtat. Ku e rekonosementu aki nos ta ekspresá nos orguyo pa tur nos koleganan ku kada dia di nobo ta hasi nan trabou ku dedikashon na Duana.
