Obligashon di mèldu Propiedat Inmóbil
Entrante promé di yanüari 2024, e Belastingplan BES 2024 (Plan di Impuesto BES 2024) a drenta na vigor. Esaki ta kontené diferente regla di impuesto nobo pa Boneiru, Saba, i Sint Eustatius.Un di e medidanan ta ku bo mester mèldu serka Ofisina di Impuesto ora bo a kumpra un bibienda òf un edifisio komersial. E obligashon aki ta sòru ku tur hende ku ta doño di un propiedat inmóbil i ku lo mester haña un aanslag, ta haña un aanslag di propiedat inmóbil tambe. Si bo no mèldu esaki, bo ta kore riesgo di haña un but.
Ki ora bo mester mèldu?
Tin tres situashon pa kua a introdusí e obligashon di mèldu Propiedat inmóbil:
- Pa esnan ku na dado momentu (for di promé di yanüari 2024) ta kuminsá disfrutá di un bien inmóbil en virtut di propiedat, poseshon, òf un otro derecho limitá. Por ehèmpel: bo a kumpra un bibienda òf un edifisio komersial dia promé di yanüari 2024.
- Pa esnan ku na dado momentu ta disfrutando di un bien inmóbil en virtut di propiedat, poseshon, òf kualke otro derecho real a kousa di lokual (for di dia promé di yanüari 2024) kambionan na e bien inmóbil ei a tuma lugá dor di konstrukshon, renobashon, mehorashon, desmantelashon òf destrukshon. Por ehèmpel, bo a laga hasi un renobashon, òf a laga traha un pisina (oumento di balor). Òf a desmantelá parti di e edifisio (bahada di balor).
- Pa esnan ku (entrante promé di yanüari 2024) na komienso di un aña kalendario ta disfrutá en virtut di propiedat, poseshon òf derecho limitá i denter di un aña despues di kabamentu di e aña kalendario ei no a haña un papel di belasting pa impuesto riba propiedat inmóbil.
Denter di ki término bo mester mèldu?
E periodo denter di kua mester mèldu ta diferensiá. Pa e situashonnan menshoná bou di e promé dos partinan akiriba, e término ta kuater luna despues ku kuminsá disfrutá di e bien inmóbil, òf kuater luna despues ku un kambio di e bien inmóbil a tuma lugá.
Esun ku na komienso di un aña kalendario ta disfrutá en virtut di propiedat, poseshon òf derecho limitá, i denter di un aña despues di kabamentu di e aña kalendario ei no a risibí un papel di belasting (di tres situashon), mester mèldu denter di kuater luna despues di kabamentu di e aña ei.
Ken mester mèldu?
Tur hende ku entrante promé di yanüari 2024 a kumpra un propiedat inmóbil, a hasi un kambio na nan propiedat inmóbil òf pa esun ku entrante promé di yanüari 2024 no a risibí un papel pa impuesto inmóbil i sí debe impuesto di propiedat inmóbil pa e aña ei.
Si vários persona òf órgano ta disfrutando di un bien inmóbil en virtut di propiedat, poseshon òf derecho limitá, un di nan mester mèldu na nòmber di tur e personanan òf órganonan ei.
Kon bo por mèldu?
Bai riba e wèpsait di Belastingdienst, klek riba e link i habri e formulario pa mèldu Impuesto riba Propiedat inmóbil. Bo ta yena e formulario i mand’e. Despues bo ta risibí un meil di konfirmashon.
But
Ta importante pa mèldu na tempu. Si bo no mèldu na tempu, òf si no a fiha e papel di belasting òf si a fiha un suma demasiado abou, por imponé un but. E but por subi te na un suma máksimo di 100 porshento di e suma di e aanslag ku bo ta haña.
Pregunta?
Bo tin pregunta tokante e obligashon di mèldu Propiedat Inmóbil? Den e kaso ei, bo por manda un meil pa Belastingdienst, balie@belastingdienst-cn.com