Kambionan prinsipal for di promé di yanüari 2023
Akibou bo ta haña e kambionan fiskal di mas importante ku ta na vigor na Hulanda Karibense for di promé di yanüari 2023:
- Subida di e suma liber di impuesto
- Subida di e altura mínimo di e sueldo usual den e impuesto riba sueldo BES
- Kontinuashon di e bahada di akseins riba gasolin ku a introdusí entrante promé di aprel 2022
- Imposishon di e tarifa nulo òf eksonerashon di importashon, entrega òf suministro i instalashon di panel solar, kolektor solar i turbina di bientu na Hulanda Karibense
Subida di e suma liber di impuesto
Entrante promé di yanüari 2023, e suma liber di impuesto ta bira konsiderablemente mas haltu ku den e añanan anterior, esta $17.352. Esaki ta un subida di $5.154 al respekto di e suma liber di impuesto di 2022, ku ta suma $12.198. (Subida suma liber di impuesto entrante promé di yanüari 2023 pa 17.352 USD)
Durante kalkulashon di e impuesto di entrada, e primanan AOV, AWW i e parti di empleado di e seguro di kuido por tene kuenta ku e suma liber di impuesto. E suma liber di impuesto ta nifiká ku no ta imponé impuesto riba un parti di e entradanan suheto na impuesto.
Subida di e altura mínimo di e sueldo usual den e impuesto riba sueldo BES
E areglo di sueldo usual ta enserá ku ta asumí ku un titular di interes sustansial di un entidat ta risibí un sueldo ku ta normal pa e nivel i e durashon di su labor. Entrante 2023 lo adaptá i subi e suma normativo pa aplikashon di e areglo di sueldo usual di $14.000 pa $25.000.
Kontinuashon di e bahada di akseins riba gasolin ku a introdusí entrante promé di aprel 2022
Lo ekstendé e bahada di akseins riba gasolin introdusí entrante promé di aprel 2022 te ku 30 di yüni 2023. Entrante promé di yüli 2023 lo parti e bahada temporal di 16 sèn di dòler di akseins riba gasolin (8 sèn di dòler) na dos. Despues, entrante promé di yanüari 2024 lo bai bek na e tarifanan, manera esakinan tabata aplikabel sin e bahadanan.
Imposishon di e tarifa nulo òf eksonerashon di e importashon, entrega òf suministro i instalashon di panel solar, kolektor solar i turbina di bientu na Hulanda Karibense
Entrante promé di yanüari 2023 lo imponé e tarifa nulo riba importashon di panel solar, kolektor solar i turbina di bientu, o sea eksonerashon di impuesto di konsumo general (Algemene bestedingsbelasting) na Hulanda Karibense.
Pa kompanianan di elektrisidat lo imponé e entrega òf suministro i instalashon di panel solar, kolektor solar i turbina di bientu ku e tarifa nulo. Meta di e tarifa nulo pa kompanianan di elektrisidat ta pa prevení akumulashon di impuesto di konsumo general ora di konstrukshon di parke di solo i/òf bientu. Pa otro empresario ku no ta kompanianan di elektrisidat, tambe partikular, un eksonerashon di impuesto di konsumo general ta aplikabel.
E kambio aki ta konta tambe pa por ehèmpel instalashon di kabel, material di montahe i asina yamá optimisers i inverters. I pa adaptashon di e kashi di koriente en konekshon ku kompra di panel solar.
Pa otro trabounan relatá, manera un posibel fortifikashon di e dak òf instalashon di un pòmp di kalor, sí mester paga impuesto di konsumo general.