Subida suma liber di impuesto entrante promé di yanüari 2023 pa 17.352 USD
A fiha e suma liber di impuesto na Hulanda Karibense pa 2023 na 17.352 USD. Esaki ta un subida di 5.154 USD respekto e suma liber di impuesto di 2022, ku ta suma 12.198 USD.
Ora di kalkulá e impuesto riba entrada, e primanan AOV, AWW i e parti di trahadó di e seguro di kuido, por tene kuenta ku e suma liber di impuesto. E suma liber di impuesto ta nifiká ku no ta paga impuesto riba un parti di e entradanan suheto na impuesto.
Sekretario di Estado Marnix van Rij (Fiscaliteit en Belastingdienst; Impuesto i Ofisina di Impuesto):
“Ku e subida di e suma liber di impuesto ku mas ku 40% pa 17.352 UDS, nos ta yuda hende ku nan entrada i den nan siguridat di eksistensia. Ademas, nos ta sòru pa klaridat tambe, dor di hasi e suma liber di impuesto igual na e sueldo mínimo di mas haltu na Hulanda Karibense. Komo gabinete nos a mira riba diferente tereno ku a pidi atenshon pa esaki den e temporada ku ta tras di lomba. Nos ta kompronde esaki. Mi ta kontentu ku p’esei awor nos por yuda hende konkretamente i ofresé klaridat pa tur hende”.
Riba entradanan te ku 17.352 USD no mester paga impuesto.
Riba entradanan mas haltu ku e suma di 17.352 USD mester paga 30,4 % di impuesto i riba entradanan mas haltu ku e suma di 281.921 USD, 35,4 %.