Bo no ta di akuerdo ku un papel di belasting òf desishon?
Bo no ta di akuerdo ku un papel di belasting? Òf ku un desishon ku bo por oponé? Oponé e ora ei denter di 2 luna despues di e fecha di e papel di belasting òf e desishon ku bo no ta di akuerdo kuné. Mester entregá un karta di opheshon por eskrito (riba papel) serka e inspektor di Ofisina di Impuesto Hulanda Karibense (Belastingdienst Caribisch Nederland). Den e karta di opheshon aki, bo ta splika pakiko bo no ta di akuerdo ku e desishon.
Pa fundamentá bo opheshon, bo por agregá anekso.
Yena formulario òf skibi karta
Bo ke oponé? E ora ei, klik aki pa e formulario di opheshon.
Bo por skibi un karta tambe. Manda esaki pa Belastingdienst CN na Boneiru, Saba òf Sint Eustatius.
Bo karta en todo kaso mester kontené:
- Na tópiko “karta di opheshon”
- e fecha ku bo ta manda e opheshon
- bo nòmber i adrès
- e papel di belasting òf e desishon ku bo ta oponé
- number di e papel di belasting òf karakterístika di e desishon
Si bo inkluí un kopia di e papel di belasting òf di e desishon, nos lo tin tur kos kla, pero no ta un obligashon pa hasi esaki. - e motibu di bo opheshon
- bo nòmber i bo firma na e parti abou di e karta
Bo tin dokumentonan tambe ku ta sostené bo opheshon? E ora ei, manda kopia di eseinan tambe. Nunka manda e dokumentonan original.
Esaki no ta un obligashon, pero e ta kumbiniente sí: pone bo number di telefòn i bo meil den bo opheshon. Asina ta mas fásil pa nos hasi pregunta i duna splikashon. Kisas asina nos por yuda bo mas lihé.
Bo ke outorisá un hende pa oponé pa bo?
Esei ta posibel; bo por laga un otro hende oponé un papel di belasting pa bo. Bo mester inkluí un outorisashon pa esaki.
Bo ke splika bo karta di opheshon verbalmente?
Bo tin e posibilidat pa splika bo opheshon verbalmente. Si bo ke hasi esaki, bo mester indiká esei di forma kla den bo karta di opheshon. Tambe ta posibel pa inspektor invitá bo pa duna informashon èkstra òf pasobra e ke splika bo pakiko a fiha e papel di belasting asina.
Kiko ta pasa despues ku bo a oponé?
Promé, bo ta haña un konfirmashon por eskrito ku a risibí bo karta di opheshon, den kua ta menshoná e fecha ku a risibié. Nos ta manda e konfirmashon pa bo mas pronto posibel. Despues di esei, nos lo trata ku bo opheshon i manda bo un desishon.
Por dura un máksimo di 9 luna promé ku nos tuma un desishon riba bo opheshon. Bo ta haña un karta ku ta menshoná e desishon, ku motivashon. Belastingdienst CN ta hasi esfuerso pa yega na un término konsiderabelmente mas kòrtiku pa tuma e desishon.
Ademas, tambe tin e posibilidat pa ekstendé e término aki ku 9 luna. Esaki ta posibel por ehèmpel pasobra nos a puntra bo pa mustra dokumentashon mas aleu. Òf pasobra tin un investigashon di e bukinan andando serka e empresa en kuestion.
Hasi un apelashon
Naturalmente ta posibel ku, den kaso di un rechaso òf di un desishon kontrario, bo no ta di akuerdo ku e desishon ei, a pesar di e motivashon. E ora ei, denter di 2 luna despues di e resolushon òf e desishon ku a sigui e opheshon, bo por hasi un apelashon serka korte di promé instansia BES.
Riba wèpsait di Korte Komun di Hustisia tin pará kon bo por hasi un apelashon i kiko ta e gastunan ku bo mester tene kuenta kuné. E ora ei, hues lo bolbe evaluá e kuestion, teniendo kuenta ku e argumentonan ku bo a skibi den bo karta di apelashon. Despues, hues ta duna un veredikto.
Pago
Si bo a oponé, tòg lo bo mester paga promé. Bo no por warda ku bo pago te ora duna un veredikto riba bo opheshon. Si despues di a trata ku bo opheshon resultá ku bo a paga di mas, naturalmente bo ta haña bo sèn bèk. Si bo no por paga, eventualmente bo por pidi suspenshon di pago. Bo por hasi esaki dor di yena un formulario òf manda un meil òf un karta na balie@belastingdienst-cn.nl