Dia promé di yüli 2021 un kambio di Wet ter voorkoming van witwassen en financieren van terrorisme BES (WWFT-BES) (Lei di prevenshon di labamentu di plaka i finansiamentu di terorismo BES, WWFT-BES) lo drenta na vigor, ku kua ta intensifiká e medidanan preventivo kontra labamentu di plaka i finansiamentu di terorismo na Hulanda Karibense. Ku esei e kambio ta dirigí riba riesgonan ku a determiná den e National Risk assessment BES, ta solushoná bottlenecknan ku a resultá den práktika di aplikashon di e WWFT-BES i ta sòru pa un implementashon kompleto di e normanan di e Financial Action Task Force (FATF). Finalmente e kambio ta hiba na implementashon di e plan di akshon labamentu di plaka (Tweede Kamer 31.477, 41) di e Ministernan di Finansa i Hustisia i Seguridat.
Hopi parti di e WWFT-BES ta kambia. Despues di esaki ta sigui e kambionan di mas importante den e parti ku ta kai bou di outoridat di Duana CN. Ta trata di lo siguiente:
Amplifikashon definishon medio líkido
Na promé lugá a kambia e konsepto “plaka” den e stipulashon di definishon pa “medio líkido ” i a amplia e definishon. Ku e kambio ta trese oro i djamanta bou di e definishon di e konsepto nobo medio líkido den e WWFT-BES.
Den nan rekomendashon (number 32), FATF ta trese dilanti ku metal presioso i piedranan presioso ta hopi líkido, fásil pa kambia i útil pa transportá balor. Investigashon di FIOD, FATF i Europol a mustra ku ora ta trata di e bienes aki regularmente ta papia di un orígen kriminal i ku (frekuentemente) ta usa krusamentu di frontera den kuadro di e proseso di labamentu di plaka. Tambe ta resultá den práktika ku kriminalnan kontinuamente ta inventá métodonan nobo pa desplasá sumanan di balor relativamente grandi pafó di bista di outoridatnan. P’esei a inkorporá un base pa designá kargadó di balor òf bienes di balor adishonal komo medio líkido via algemene maatregel van bestuur (ordenansa atministrativo general). Por usa e base aki por ehèmpel pa apuntá otro sortonan di metal òf piedra presioso òf pa señalá otro métodonan pa fásilmente desplasá sumanan di balornan grandi físikamente.
Deber pa notifikashon di transportashon medio líkido sin supervishon
Na di dos lugá a stipulá reglanan pa transportenan sin supervishon di medio líkido manera postcolli, karganan ku servisio di mensahero, ekipahe sin supervishon òf karga via kònteiner. FATF den su informe ta señalá ku e enfoke riba transportashon pa personanan ora di kombatimentu di labamentu di plaka a pone ku tin tiki bista pa transportenan di medio líkido sin supervishon i ku transportenan di medio líkido ta suheto na mesun kontrol ku transportenan sin supervishon di bienes komun. Den e kambio di e WWFT-BES pa kasonan asina a inkorporá un deber di notifikashon. Un notifikashon ta diferente for di un deklarashon den e sentido ku ta hasi un notifikashon riba petishon di duana, miéntras ku un deklarashon mester tuma lugá semper i sigun propio inisiativa. Antes transportenan sin supervishon di medio líkido tabata kai bou di transporte regular di bienes. Konsekuentemente duana no tabatin outoridat adishonal pa loke ta trata transportenan sin supervishon di medio líkido, mientras ku sí por usa nan pa metanan kriminal. Dor di introdusí e notifikashon ora di transporte sin supervishon ta ankra supervishon i mantenshon riba transporte sin supervishon den e WWFT-BES.
Sumanan bou di e balor mínimo di 10.000 USD
Finalmente a inkorporá un outorisashon pa duana pa den kaso di transporte di medio líkido bou di e balor mínimo (bou di 10.000 USD), pero pa kua sí tin indikashonnan ku e transporte aki tin di haber ku aktividatnan kriminal, tambe pidi un notifikashon. E outorisashon aki ta konta tantu pa transporte pa personanan komo transporte sin supervishon. Awor, kriminalnan ku ta deseá di evitá kòntròl di duana por hasi esei dor di transportá medio líkido bou di balor di e suma stipulá den WWFT-BES. E tipo di evitamentu simpel ei ta indeseabel. Ku e outorisashon aki, ora di transporte di e tipo di medio líkido aki, duana por pidi un notifikashon i mèldu e notifikashon aki na Financial Intelligence Unit – Nederland (FIU).
Pa e sobrá tambe a amplia e datonan rekerí den e formulario di deklarashon. Pues pa esaki e ora ei Minister di Finansa tambe a stipulá un formulario di deklarashon nobo.
Maneho di but medio líkido
FATF tin hopi rekomendashonnan ku ta rekonosé komo e norma internashonal pa kombatimentu di labamentu di plaka i finansiamentu di terorismo.
Un di eseinan ta trata transporte físiko di plaka den kua entre otro ta indiká ku e paisnan tin sanshonnan ku ta efikas, proporshonal, i ta sirbi pa desanimá violashon di e deber pa deklará medio líkido
Den e kuadro aki a hasi adaptashonnan den e WWFT-BES i e Besluit WWFT-BES (Desishon WWFT-BES) i esakinan ta drenta na vigor entrante promé di yüli 2021.
Den e Besluit WWFT-BES a inkorporá un artíkulo nobo, ku ta bisa asina:
Artíkulo 10a: “Kontrali na loke tin stipulá den e artíkulonan 6 te ku 10 e but atministrativo ku mester imponé a base di e artíkulonan 4.2 i 4.3 maksimalmente ta suma e kantidat ku a stipulá pa e di kuater kategoria*, menshoná den artíkulo 27, insiso kuater, di e Kódigo Penal BES.”
*Di kuater kategoria aktualmente ta USD 14.000.
Ta formulá e Maneho di but medio líkido di Duana CN di e siguiente manera.
E sistema di sanshon penal BES pa violashon di e deber di deklarashon medio líkido intenshonal i sin intenshon konosé un máksimo legal di USD 14.000. Esei ta nifiká lo siguiente:
|
But |
|
|
Violashon deber di deklarashon |
Altura but atministrativo |
|
Sin intenshon |
10% di e balor total medio líkido na USD (te ku un but finansiero máksimo di USD 14.000). |
|
Intenshonal |
30% di e balor total medio líkido na USD (te ku un but finansiero máksimo di USD 14.000). |