Ganashi for di empresa

Atministrashon adekuá

Aki bo ta indiká e ganashi for di empresa, entregando un balansa i un kuenta di ganashi i pèrdida. Ora bo tin un propio empresa òf ta ehersé un profeshon independientemente, por ehèmpel un empresa individual, ta bo deber pa mantené un atministrashon adekuá di bo entradanan i gastunan. Ta referí bo na e bista general abou di gastu ku ta dedusibel, dedusibel te na un limite, òf no ta dedusibel.

Bista general gastu dedusibel, dedusibel te na un límite i no dedusibel

Tipo di gastu	Gastu empleado	Gastu empresario IB
Lugá di traha den e kas di e pagadó di impuesto	Dedukshon kondishonal	Dedukshon kondishonal
Tráfiko di kas pa trabou	Sin dedukshon	Sin dedukshon
Boto ku ta usa ku ophetivo representativo	Sin dedukshon	Sin dedukshon
Paña di trabou	Dedukshon	Dedukshon
Paña komun	Sin dedukshon	Sin dedukshon
Literatura profeshonal	Dedukshon	Dedukshon
Abono di telefòn riba nòmber privá	Sin dedukshon	Sin dedukshon
Gastu aktividat kriminal	Sin dedukshon	Sin dedukshon
Plaka di soborno	Sin dedukshon	Sin dedukshon
Zonido i imágen, aparato kòmpiuter i aparato telekomunikashon	Dedukshon, gastunan repartí den 3 aña i mínimo di         USD 419	Dedukshon total
Kurso, kongreso, seminar, simposio	Dedukshon 75%, máksimo di USD 1.397	Dedukshon 80%
Kuido personal	Sin dedukshon	Sin dedukshon
Kuminda, bibida i stimulante	Sin dedukshon	Dedukshon 80%, wak artíkulo 9c insiso 4
Regalo i regalo di trabou	Sin dedukshon	Dedukshon 80%, wak artíkulo 9c insiso 4
Representashon (resepshon, reunion festivo i dibertishon)	Sin dedukshon	Sin dedukshon
Ekskurshon, biahe di estudio	Sin dedukshon	Dedukshon 80%
Buèltu den outo pa empresa	USD 0.20 pa kilometer	Pa outo privá: USD 0.20 pa kilometer. Pa outo di empresa: sin límite
Gastu di outo poné na disposishon	Solamente gastu kombustibel (gasolin òf diesel)	No ta aplikabel

Ora di kalkulá bo ganashi en todo kaso bo mester tene kuenta ku e siguiente puntonan:

Outo di empresa – Ora e outo ta pertenesé na aktivo di bo empresa i ta kita e gastunan for di e ganashi, e ora ei bo mester tene kuenta ku e uso privá tambe. Pa esei bo mester añadí 15% di e balor original di un outo nobo, inkluso añadí ABB di e outo na e ganashi, kon tal ku por dedusí maksimalmente e gastunan real ménos 15% di e balor di e outo nobo, inkluso impuesto riba volúmen i impuesto riba importashon, for di e ganashi. Si e outo ta aktivo privá, e ora ei por buk e gastunan di buèltu pa empresa, eksepto tráfiko di kas pa trabou, te un suma di USD 0,20 pa kilometer, komo gastu di empresa. Aki tambe bo mester aneksá un atministrashon di kilometer balansá.

Propiedat inmóbil – Ora un propiedat inmóbil ta pertenesé na e kapital di e empresa di e empresario, por distinguí e siguiente situashonnan:

1. e propiedat inmóbil ta na disposishon di e doño/ empresario komo residensia prinsipal (kas propio);
2. e doño/ empresario ta hür e propiedat inmóbil ku tersera partinan òf ta pon’é na disposishon di tersera partinan;
3. e propiedat inmóbil ta na uso di e empresa.

Propio kas – Ora un bibienda ta pertenesé na bo kapital di empresa i e bibienda aki ta na bo disposishon komo residensia prinsipal, bo mester suma e balor di hür di e bibienda aki na e ganashi. Bo por deskontá e gastunan di mantenshon di e bibienda aki for di e ganashi. Gastunan di drechamentu no ta dedusibel.
Paga tinu!  Gastunan di depresiashon ta dedusibel.

Paga tinu! Interes di hipotek ta dedusibel sin límite.
Paga tinu! Otro gastu, manera seguro di kandela, grondbelasting (impuesto di tera), erfpachtcanon (suma di èrfpagt) i grondhuur (hür di tera), no ta dedusibel.

Hürmentu propiedat inmóbil – Ora bo hür un propiedat inmóbil ku ta pertenesé na bo kapital di empresa ku hende, henter e entrada di hür ta kargá ku impuesto i e gastunan manera mantenshon, seguro di kandela, grondbelasting (impuesto di tera), erfpachtcanon (suma di èrfpagt), grondhuur (hür di tera), i depresiashon ta dedusibel henteramente.

A pone bibienda na disposishon – Ora abo komo empresario pone un bibienda ku ta parti di bo kapital di empresa, na disposishon di un empleado, bo a maksimalisá e dedukshon di gastu di e bibienda aki. Bo no por dedusí mas gastu ku e suma ku ta kalkulá serka e empleado komo balor di hür ku ta kargá ku impuesto (entrada in natura) ku ta konsiderá komo entrada, siendo 4.8% di e balor di benta di e bibienda plùs 2% di e balor di e bibienda (pa aplikashon di e (impuesto) di tera) ku un máksimo di USD 1.676.