Dedukshon di invershon
Dado kaso ku den un aña kalendario invertí un suma di mas ku USD 2.794 den aktivonan, ta kita 8% di e suma di invershon for di e ganashi di tantu e aña di invershon komo e aña siguiente. Si esaki ta un invershon den edifisionan nobo òf un mehorashon di edifisionan eksistente, e ora ei ta kita 12% di e suma di inverson for di e suma di ganashi.
Na 2015 bo a enahená (por ehèmpel bende) un aktivo, pa kua bo a risibí dedukshon di invershon? E ora ei por ta ku bo mester yena adishon di desinvershon (desinvesteringsbijtelling).
Bo a enahená un edifisio? E ora ei bo mester yena e adishon ora esaki a pasa denter di 15 aña despues ku bo a invertí den e edifisio. E ora ei e adishon ta 12% di e suma di invershon.
Ta trata di un otro aktivo? E ora ei e periodo ta 6 aña i e adishon 8%.
Adishon di desinvershon
Ora di enahenashon di un aktivo pa kua a risibí dedukshon di invershon, riba e ganashi di tantu e aña di enahenashon komo e aña despues un adishon di desinvershon mester tuma lugá. E suma di e adishon ta konsistí di un porsentahe di e preis di transferensia, pero no mas haltu ku e suma di invershon. E porsentahe aki ta dependé di e porsentahenan ku a apliká ora di e invershon (8 òf 12%). Ta papia di desinvershon, ora enahená e aktivo denter di 6 aña (pa edifisio 15 aña) despues di komienso di e aña kaminda e invershon a tuma lugá. Si bo a hasi invershonnan pa kua bo a claim deskuento riba invershon, e ora ei bo mester aneksá un estado di depresiashon (afschrijvingsstaat) serka bo relato anual riba kua a spesifiká kada aktivo apart.
Enahenashon di un aktivo ke men benta di un aktivo.
Aktivonan
Aktivonan ta rekurso ku bo no ke bende direktamente, pero ku bo ta usa pa un kantidat di aña den bo negoshi. Pues nan ta diferente for di kompra i stòk. Bo mester di aktivo pa por traha bo produktonan òf por duna bo servisionan.
Ehèmpelnan di aktivonan ta:
- edifisio, mashin, outo, inventario i otro rekurso duradero ku bo ta usa pa maneho di empresa (e aktivonan material)
- pèrmit i otro rekurso no tangibel ku ta útil pa e negoshi i di kua e uso ta hiba na un bahada di balor di e pèrmitnan (e aktivonan inmaterial)