Archivá atministrashon
Kada empresario tin e deber legal di warda su atministrashon pa shete aña (deber fiskal di warda). Bo ta laga hasi (un parti di) bo atministrashon dor di un ofisina di servisio via kòmpiuter òf servisio di suèldo? E ora ei e portadornan di dato di e ofisinanan ku ta duna e servisionan aki, ku ta kontené dato tokante bo empresa, tambe ta kai bou di e deber fiskal di warda.
Atministrashon
Tur dato tokante bo empresa ku bo ta fiha riba papel òf elektrónikamente, ta parti di bo atministrashon. Ehèmpelnan di esaki ta:
- atministrashon di kaha (tambe nota den klat) i resibu di kaha;
- notanan finansiero, manera buki di kompra i di benta;
- kalkulashonnan ku a hasi debesenkuando pa kontrolá;
- faktura ku a drenta i kopianan di faktura ku a manda;
- statement di banko;
- kontrakt, areglo i otro afsprak;
- agènda i buki di afsprak;
- korespondensia;
- software i failnan di dato.
Hopi di e informashon nesesario pa rùn un empresa, promé ta fiha elektrónikamente. Aki no ta trata solamente di e failnan di e atministrashon finansiero. Pensa tambe por ehèmpel na e agènda di empresa ku bo ta tene ku bo telefòn selular òf Asistente Digital Personal (PDA). Òf na e datonan di benta ku bo ta registrá ku un sistema di kobransa, un kaha simpel òf un sistema Point of Sale.
Hopi sistema di kobransa no ta kuadra ku nos eksigensianan. P’esei informá bo mes bon ora di kumpra un sistema di kobransa. Mas i mas atministrashonnan, pero tambe partinan di e proseso di empresa (manera benta via un webwinkel) ta bai via internet. E datonan aki tambe ta parti di bo atministrashon!
Tambe ora bo ta prent dato riba papel, sea mesora òf mas lat, bo mester warda e datonan elektrónikamente.
Bo por diseñá i tene bo atministrashon di un forma ku ta pas ku bo empresa. Den esaki bo mester tene kuenta sí ku bo atministrashon ta e base pa bo deklarashonnan. Si bo atministrashon no ta kompleto i no por kontrol’é denter di un término rasonabel òf ora bo no ta warda bo atministrashon pa sufisiente tempu, e ora ei esei por tin konsekuensha fèrfelu. E ora ei nos por fiha bo volúmen di benta i bo ganashi i kalkulá e impuesto.
Mester stipulá e proseso di empresa kompletamente i rasonablemente detayá. Si bo ta stipulá e datonan elektrónikamente, bo mester warda esakinan elektrónikamente tambe. Anto pa e término di warda di shete aña. Bo por warda e datonan solamente riba papel si bo tin un atministrashon hopi chikí ku por kontrolá denter di un término rasonabel.