Kiko mi por bai kuné?
Ora bo ta biaha generalmente bo ta hiba bienes personal manera paña, artíkulo di higiene personal òf un kámara pa saka potrèt. Durante bo estadia na Hulanda Karibense bo ta usa e bienes aki. Ora di salida bo ta bai bèk ku e bienes aki. E ora ei bo a importá e bienes temporalmente na Hulanda Karibense, únikamente pa bo uso personal. Den e kaso ei bo no mester paga ABB. E eksonerashon aki no ta konta pa bienes suheto na akseins manera sigaria i bibida ku ta kontene alkohòl, serka kua bo mester tene bo na e kantidatnan manera ta stipulá den e tabèl dispensashon di biahero.
Paga tinu! E Duana por pidi bo pa un bòrg, si tin e suposishon ku kisas bo ke bende òf regalá e bienes na e isla kaminda bo no ta biba. Esaki ta nifiká ku bo mester paga e suma na ABB (Algemene Bestedingsbelasting; impuesto general di konsumo) ku ora di importashon normal tambe lo bo mester a paga. Ora di sali for di e isla ku e bienes bo por haña e suma bèk atrobe.