Tarifa ABB

Diferensia den tarifa

Tin tarifa general pa:

• suministro di servisio
• suministro di merkansia
• importashon di merkansia

Ademas otro tarifa ta na vigor pa:

• servisio riba tereno di seguro
• importashon i/òf suministro di outo di famia (hopi ekonómiko)
• merkansia ku no ta importá ni ta eksportá i/òf ta trese bou di un régimen di duana.

Skema di tarifa pa kada teritorio insular

Pa e teritorionan insular di Sint Eustatius i Saba un tarifa general diferente i un tarifa pa servisio riba tereno di seguro diferente ta na vigor, kompará ku Boneiru.

Den forma di tabèl:

Skema di tarifa pa kada teritorio insular
Teritorio insular	Boneiru	Sint Eustatius      i Saba
Tarifa general - suministro/importashon	8%	6%
Tarifa general - servisio	6%	4%
Seguro	7%	5%
Outo di famia	25%	25%
Outo di famia hopi ekonómiko	0%	0%
Merkansia prosedente di pafó di e islanan BES i ku no a importá	0%	0%
Merkansia eksportá pa un produktor, ku ta stòk i/òf ku ta trese bou di un régimen di duana i ku ta destiná pa eksportashon.	0%	0%

Outo

Un splikashon pa loke ta trata outo:

Outo di famia hopi ekonómiko

Un outo di famia hopi ekonómiko ta un outo di famia sin emishon di CO2 (eléktriko).

Outo di entrega i pikòp

Pa outo di entrega ta komprondé un vehíkulo motorisá ku un espasio pa karga ku no ta diseñá pa transporte di persona, pero ku ta provisto kompletamente di un flur plat pa karga i ku ademas mester kumpli ku sierto midí. E midínan aki ta derivá for di e lei hulandes tokante impuesto di outo di famia i motosikleta 1992 (Nederlandse Wet op de belasting van personenauto's en motorrijwielen 1992).

Mi tin un outo di entrega òf un pikòp?

Na e islanan BES ta hasi hopi uso di e asina yamá pikòp. Ta dependé di e sorto, ma un pikòp por ta un outo di famia òf un outo di entrega. E skema abou ta duna e base pa e distinshon ente un pikòp i un outo di entrega.

Distinshon Pikòp / Outo di entrega
Sorto di outo di entrega	Diseño	Eksigensia di diseño
Pikòp ku baki habrí, kabina ènkel i Xtrcab (1,5 kabina)	Baki habrí	Largura mínimo 125 cm i hanchura 20 cm.
Pikòp ku kabina dòbel i baki habrí	Baki habrí	Largura mínimo 150 cm i ademas un mínimo di 2/3 parti di e largura ku e baki lo tabatin sin e lugá di sinta èkstra.
		E espasio pa karga original ta kuminsá na un skòt fiktisio, ku a pone na un distansia di 115 cm tras di e punto di más patras di e stürwil. Un mínimo di 40% di e largura ta situá dilanti di e kurason di e as di más patras.

Globalmente, esaki ta enserá ku ta konsiderá e pikòp ku un kabina ènkel komo un outo di entrega i e pikòp ku un kabina dòbel komo un outo di persona.