Importashon merkansia
E punto di salida ora di importashon di merkansia ta ku ta kobra ABB riba importashon. No solamente empresario, sino tambe no empresario (komo persona privá) lo tin di haber ku ABB na momentu di importashon di merkansia. Pues pa e importashon no ta importá si bo ta un empresario sí òf nò.
Ki ora ta papia di importashon di merkansia?
Ta papia di importashon ora ta;
- Trese merkansia riba merkado liber na e islanan BES; Ehèmpel: Un empresario na Sint Eustatius ta bende prenda. Regularmente e empresario ta bishitá Merka i einan ta kumpra prenda, ku e ta trese den su ekipahe di biahe. Na yegada na Sint Eustatius e empresario ke trese e merkansia riba merkado liber (pa por bende esaki den su pakus). E empresario e ora ei ta yena un deklarashon di importashon na Duana i pa motibu di e importashon ta debe ABB.
- Terminá i/òf retirá merkansia for di un régimen di duana na e islanan BES; Ehèmpel: Un empresario ku ta eksplotá un negoshi di taksi a kumpra un outo i a import’é ku dispensashon (di taksi) di ABB. Ora di kòntròl ta resultá ku no (t)a usa e outo komo taksi. E ora ei ainda tin ku paga e ABB.
- Terminá i/òf saka merkansia for di un depósito di merkansia i servisio instituí na e islanan BES; Ehèmpel: Un empresario ta bende sigaria na aeropuerto. E punto di benta ta karakterisá komo un depósito di merkansia i servisio. E sigarianan ta destiná pa benta na pasahero ku ta sali for di e isla BES. Si e empresario bende sigaria ku persona ku no ta sali for di e pais tambe (por ehèmpel personal di e aeropuerto) ta papia di retirá merkansia for di un depósito di merkansia i servisio.
- Abastesimentu di medio di transporte (por ehèmpel un boto di rekreashon) na e islanan BES ku merkansia ku no ta riba merkado liber. Ta kalkulá e ABB riba e balor di duana. E balor di duana ta inkluí e derechonan na momentu di importashon, impuesto, i imposishon i e gastunan èkstra pa komishon, emboltura, transporte, i seguro.
Dispensashonnan pa produktor
Si abo komo produktor ta importá materia prima i/òf aditivo i/òf produkto semi akabá, bo ta bini na remarke pa un dispensashon di ABB na momentu di importashon. Pa esaki bo mester entregá un petishon (bai na download) na Belastingdienst. Ta otorgá un dispensashon ABB na momentu di importashon si:
- ta hiba un tenementu di buki ku kua por sigui e produktonan importá direktamente den e atministrashon;
- ta hasi deklarashon di impuesto na ora;
- no tin pago atrasá.
Si abo komo produktor no ta hasi uso di e dispensashon ABB na momentu di importashon bo por kita e ABB ku a paga na momentu di importashon for di e deklarashon ABB.