Dispensashon ABB

Merkansia i/òf servisio ku tin dispensashon di ABB

E siguiente suministronan di merkansia i/òf servisio na e islanan BES tin dispensashon di ABB. Pa por lesa e teksto fásilmente, tin bia a abreviá e teksto pa kada dispensashon.

• Suministro di pan, grano, batata i aros. Snèk manera ontbijtkoek, wafel di aros i buskuchi no ta konsiderá di ta pan, pero pan pa desayuno (croissant) i pan bake-off sí ta konsiderá di ta pan;
• Suministro di transporte públiko di persona i servisio di bùs di skol riba kaya (taksi, bùs etc.);
• Servisio ku hospital i laboratorio ta hasi pa eksámen médiko, pero tambe e servisionan ku dòkter, dentista, tékniko dental, enfermero i frumú, fisio i terapista di ehersisio, kiropráktiko, logopedista, dietista, podoterapista i sikólogo ta hasi;
• Suministro di remedi pa uso humano ku resèpt di dòkter;
• Suministro di miembro artifisial i medio di sosten médiko;
• Suministro di enseñansa no komersial. Aki ta trata di enseñansa, pagá i organisá pa gobièrnu i suministrá pa empresario ku no ta hasié pa hasi ganashi, enseñansa general pa formashon, preparashon profeshonal, pero tambe enseñansa di músika, baile, drama i arte plástiko na persona bou di 21 aña. Enseñansa ku un karakter di tempu liber (por ehèmpel lès di kore outo i motersaikel) i tambe ta sirbi pa optené abilidat den e esfera personal duná na no hóbennan, den niun kaso no ta dispensá. E ora ei no ta papia di un preparashon profeshonal;
• Suministro di karga postal ku servisio di pòst tin e obligashon di transportá;
• Suministro di awa, koriente i gas pa kompania di awa, koriente i gas, tambe suministro di kombustibel pa generá energia na e kompanianan ei;
• Suministro di un inmueble ku no ta un edifisio ku a kaba di konstruí òf un parti di un edifisio ku a kaba di konstruí i e tereno korespondiente, si tin ku paga overdrachtsbelasting (impuesto di traspaso) riba e suministro ei;
• Seguro di bida, seguro médiko i reaseguro pa kompania di seguro i servisio di intermediario na seguro. Bou di seguro di bida ta komprondé un seguro ku (kasi) eksklusivamente tin komo meta pa suministrá un òf mas término di pago i ta dependé di bida di esun sigurá. Seguro di entiero (sin importá e forma di pago) no tin dispensashon;
• Hürmentu di kamber di hotèl i apartamentu ora ta debe un impuesto di turista basá riba un ordenansa insular;
• Servisio ku ta konsistí di fasilitá partisipashon na wega di kasino, loteria, loteria di skrèch, wega di number, depositá riba number, bingo i wega paresido, si ta debe impuesto di wega di azar;
• Ponementu na disposishon i fiansa di plaka i servisio ku ta konserní título, plaka di papel (ku eksepshon di esnan ku no ta medio di pago legal i/òf tin balor pa kolekshoná. Intermediashon ta inkluí ora di ponementu na disposishon i fiamentu di plaka i servisio, ku eksepshon di kustodia i maneho;
• Suministro di merkansia i servisio na kònsul profeshonal i otro representante profeshonal di potensianan stranhero, tambe ámtenar asigná na nan i personanan ku ta biba serka nan i ta den nan servisio, tur esakinan kon tal ku nan ta stranhero i no ta empresario na e islanan BES i bou di kondishon di resiprosidat. Paga tinu! Pa e dispensashon aki bo mester entregá un petishon serka Belastingdienst;
• Servisionan di transporte pa medio di avion òf barku di laman.
• Servisionan ku ta hasi den un área kantu di laman òf serka di un aeropuerto na e islanan BES ku ta konserní merkansia ku no a importá ni eksportá ainda, i servisio na benefisio di barku di laman i avion ku ta usa komo medio di transporte públiko pa trafikashon di persona òf merkansia, (avion di guera ta inkluí den esei) pero ku eksepshon di boto di rekreashon;
• Suministro di kombustibel, lubrikante i otro líkido destiná pa propulsá, lubriká i otro uso tékniko na bordo di barku di laman i avion i tambe suministro di merkansia destiná pa abastesimentu di barku di laman ku ta sali (ku eksepshon di barku pa piska den awa na kosta), boto di salbabida, boto pa dunamentu di asistensia na laman, barku di guera ku tin un haf komo destinashon òf lugá di ankra pafó di e islanan BES, i avion;
• Servisionan hasí pa un empresario establesé den un depósito di merkansia i servisio komo tal;
• Suministro di merkansia na un empresario establesé den un depósito di merkansia i servisio, asina leu ku ta usa e merkansia ei na benefisio di merkansia i aktivonan presente den e depósito di e empresario ei;  
• Suministro di merkansia na un empresario establesé den un depósito di merkansia i servisio, únikamente asina leu ku ta hasi e servisionan ei na benefisio di aktividat pèrmití pa lei òf na benefisio di su merkansia i aktivonan presente den e depósito ei;
• Kuido di persona interná den un institushon, tambe suministro di kuminda i bibida, remedi i ferbant na e personanan ei, tambe servisio pa kas di kuido i kas di ansiano asina leu ku e servisionan aki ta dirigí riba hospedahe i kuido di e habitantenan;
• Hürmentu ku persona privá ku ta biba na e islanan BES di inmueble ku ta mueblá, destiná pa i ku ta usa komo bibienda permanente;
• Servisionan manera ta intenshon den artíkulo 7.1, kuminsamentu, parti a, di e Belastingwet BES, si ta debe overdrachtsbelasting (impuesto di traspaso) pa suministrashon di e servisionan ei. Aki ta trata di prestashonnan ku pa e ABB ta kualifiká komo servisio i ku pa e impuesto di traspaso ta kai bou di e konsepto di ‘transferensia’ (suheto na impuesto): servisionan ku ta konstituí di establesimentu, renunsia i kanselashon di usufrukto, di uso i pa biba aden, servidumbrenan, èrfpagt, edifisio (opstal), grondrenten, sea debí den sèn, sea in natura i aktonan semehante relashoná ku inmueble òf e derechonan na kua esakinan ta someté. E dispensashon di ABB no ta aplikabel si pa kualke motibu no ta imponé impuesto di traspaso.

Pa un enumerashon kompleto, wak via e siguiente lenk den e Manual ABB.