Debernan atministrativo

Derecho riba dispensashon di debernan atministrativo

Bo tin derecho riba dispensashon di debernan atministrativo ora bo ta kumpli ku e siguiente kondishonnan:

• Bo tin un kompania di un persona òf e kompania ta un akuerdo di kooperashon di persona natural, manera un sosiedat, un sosiedat kolektivo òf un firma di hòmber/muhé i bo ta stablesé na e islanan BES;
• Bo volúmen di benta pa e aña kalendario (eksklusivo ABB) ta suma ménos ku USD 10.000;
• Bo ta hasi únikamente servisio i/òf entrega no suheto na impuesto;
• Bo ta warda e dokumentonan atministrativo di un forma kla.

Pa bini na remarke pa dispensashon di debernan atministrativo bo mester entregá un petishon por eskrito (por download e petishon pa dispensashon aki) na Belastingdienst. Despues di un evaluashon bo ta risibí un desishon den kua ta partisipá bo si bo ta bini na remarke pa dispensashon di ABB sí òf nò.

Ku kua eksigensia e atministrashon mester kumpli?

E empresario mester hiba un atministrashon den kua:

• ta anotá e suministro di merkansia i servisio pa e mes i na e mes;
• ta anotá e importashon i eksportashon di merkansia pa i for di e islanan BES na unda e ta stablesé;
• ta anotá otro dato ku ta di importansia relashoná ku imposishon di e ABB;
• diariamente ta anotá gastu i ingreso di suministro di merkansia i servisio na e mes i pa e mes;
• su tenementu di buki pa loke ta trate e volúmen di benta ta hibá di un forma asina kla i evidente ku por stipulá ku e imposishon di impuesto ta sosodé di e forma korekto i ku por establesé e ABB ku debe pa un periodo di impuesto fiho;
• ta warda kopia di e fakturanan entregá pa e mes i na e mes.

Pues mester aktualisá un atministrashon regularmente i mester warda datonan pa asina bo ta kapas pa hasi e deklarashonnan di impuesto nesesario na ora i Belastingdienst tin sufisiente posibilidat pa kontrolá eksaktitut di e deklarashonnan di impuesto.   

Ta obigatorio pa entregá un faktura?

E obligashon pa entregá un faktura ta konta solamente pa un empresario ku ABB ta konsiderá un produktor. Si bo ta un empresario, pero no un produktor, e ora ei pues bo no tin obligashon di entregá faktura. 

Solamente riba petishon di e empresario ku ta kumpra serka bo, abo komo produktor tin e obligashon di entregá un faktura. Bo mester entregá e faktura denter di diessinku dia despues di e luna den kua e suministro a tuma lugá.

Si e produktor kumbiní ku e empresario ku ta kumpra ku e pago lo tuma lugá adelantá òf den parti, e ora ei e produktor, riba petishon di e empresario ku ta kumpra, kada bes ora di un pago (parsial) mester redaktá i entregá un faktura.

Paga tinu!
Si abo komo produktor mester entregá un faktura, e ora ei bo ta obligá di saka un kopia di e faktura i warda esaki.

Ku kua eksigensia un faktura mester kumpli?

Mester menshoná e siguiente datonan riba e faktura:

• e dia ku ta hasi e suministro;
• nòmber i adrès di e produktor i su kliente;
• number di Crib di e produktor;
• un number di faktura ku ta sigui kore i un fecha;
• un deskripshon i e kantidat di e merkansia suministrá;
• e pago i e suma di ABB.

Disclaimer

E informashon riba e página aki ainda no ta aktualisá i mester adapt’é en bista di e kambionan di lei ku a drenta na vigor entrante promé di yanüari 2020. P’esei bo no por derivá derecho for di esaki tampoko. Si bo tin pregunta tokante esaki, bo por tuma kontakto ku Belastingdienst Caribisch Nederland.