Herensia indiviso
Un herensia indiviso (onverdeelde boedel) por surgi ora di morto (entre herederonan den e herensia), ora di divorsio, ora di separashon hurídiko, ora di terminashon di un sosiedat registrá (notarial) entre (eks)kasánan pa loke ta trata nan kapital komun (matrimonial). E herensia ta keda indiviso te ora divishon di e komunidat di biennan, siguí pa suministro di e parti asigná na kada ken, a tuma lugá.
Si bo ta e úniko heredero den un herensia e ora ei no ta papia di un herensia indiviso. No ta papia di un herensia indiviso tampoko ora pa medio di tèstamènt di un mayor a establesé un partishon di herensia ku kua a establesé ku henter e herensia di e mayor ei ta bai pa e kasá ku ta biba mas largu i e yunan solamente ta haña un claim riba e kasá ku ta biba mas largu, mes grandi ku kada ken su parti hereditario.
Bo mester deklará e parti den e entradanan for di herensia indiviso anualmente, tambe ora ku no a risibí e parti ei ainda. Pa kitamentu di bo parti den tur gastu ku tin ke ber ku e entradanan for di herensia indiviso, manera gastu di maneho i interes, gastunan i depresiashon, mesun reglanan ta konta ku pa entradanan for di e fuente aki, ku no ta forma parti di un herensia indiviso.
Bo mester sples e entrada for di un herensia indiviso sigun tipo di fuente, pues empresa (ganashi), kapital móbil, biennan inmóbil òf otro entrada, i despues yen’é na e pregunta konserní (fuente) den e formulario di deklarashon. E reglanan di e fuente en kestion tambe ta konta pa bo parti den e entrada for di herensia indiviso. Respekto mucha menor di edat ku tin derecho riba entradanan for di herensia indiviso ku no ta parti di e entrada personal, ta kobra impuesto riba e entradanan ei serka e mayor ku ta ehersé outoridat riba e mucha menor di edat.