Gastu profeshonal
Gastu profeshonal ta gastu ku bo ta hasi pa por ehersé bo profeshon. Bo tin solamente suèldu òf bo ta gana sèn èkstra? E ora ei bo tin derecho riba un dedukshon fiho di USD 280. E dedukshon fiho no ta konta pa entrada for di un trabou anterior.
Bo tin mas gastu profeshonal?
E ora ei bo por kita e gastunan real aki si nan ta mas haltu ku USD 560. Sí, bo mester añadí aneksonan e ora ei na e deklarashon for di kua ta sali na kla ku bo gastunan profeshonal tabata mas haltu.
Gastu profeshonal ta gastu ku bo ta hasi pa por ehersé bo profeshon manera mester ta, òf pa por haña bo entrada. Ora di entrada for di empleo aktual i otro ingreso for di labor, manera sèn èkstra, bo tin derecho riba un suma fiho (suma fiho di gastu) di USD 280. Si bo gastunan profeshonal ta mas haltu ku USD 280 pa aña, bo por dedusí e gastunan real te asina leu ku nan ta suma mas ku USD 560. Si bo dedusí e gastunan profeshonal real bo mester entregá e pruebanan i un spesifikashon huntu ku e deklarashon.
Paga tinu! E dedukshon di e gastunan profeshonal real òf di e suma fiho no por suma mas ku e entradanan. Dedukshon di e gastunan profeshonal real solamente ta mas bentahoso pa bo ku e dedukshon fiho di USD 280 ora e gastunan real ta suma mas ku USD 840.
Ehèmpel 1 Ora bo gastunan real ta suma USD 750, e ora ei bo por dedusí USD 190 (750 -560) komo gastunan real. Pero e dedukshon fiho di gastu ta suma USD 280. Konsekuentemente ta konsiderá USD 280 di ta gastu profeshonal.
Ehèmpel 2 Si bo gastunan real ta suma USD 1.500 bo por dedusí USD 940 (1500 -560) komo gastunan real. Bo dedukshon fiho ta USD 280. Pa bo ta mas bentahoso pa dedusí e gastunan real en bes di e dedukshon fiho.
Paga tinu! E siguiente gastunan profeshonal no por dedusí:
- e lugá di traha, inkluso e interior, den bo kas ora:
- bo tin un lugá di traha pafó di bo kas i bo ta gana henter e suma di bo resultado for di trabou, empresa i profeshon pa ménos ku dos tersera (2/3) parti den e lugá di traha den bo kas òf ;
- bo no tin un lugá di traha pafó di bo kas na bo disposishon i bo ta gana henter e suma di bo resultado for di trabou, empresa i profeshon pa ménos ku dos tersera (2/3) parti den òf for di e lugá di traha den bo kas;
- tráfiko di trabou pa kas;
- boto ku ta usa ku ophetivo representativo;
- paña, ku eksepshon di paña di trabou. Wak despues;
- literatura, ku eksepshon di literatura profeshonal. Wak despues;
- abono di telefòn i konekshon riba internet na nòmber di e pagadó di impuesto den privá. Wak despues;
- kuido personal;
- kuminda, bibida i stimulante, representashon, resepshon, reunion festivo, ekskurshon, biahe di estudio, inkluso gastu di biahe i estadia;
- regalo i regalo di trabou;
- but;
- gastu en konekshon ku kondenashon pa un krímen;
- gastu pa prevenshon di persekushon penal;
- plaka di soborno.