Dedukshon di invershon
Ora ku den un aña kalendario ta invertí un suma di mas ku USD 2.794 den aktivonan, ta kita 8% di e suma di invershon for di e ganashi di tantu e aña di invershon komo ku e aña siguiente. Si ta trata di invershon den edifisionan nobo òf un mehorashon di edifisionan eksistente, e ora ei ta kita 12% di e suma di inverson for di e ganashi.
Den e aña ku a kaba bo a enahená (por ehèmpel bende) un aktivo pa kua bo a haña dedukshon di invershon? E ora ei por ta bo mester yena adishon di desinvershon.
Bo a enahená un edifisio? E ora ei bo mester yena e adishon si esaki a sosodé denter di 15 aña despues ku bo a invertí den e edifisio. E ora ei e adishon ta 12% di e suma di invershon.
Ta trata di un otro aktivo? E ora ei e periodo ta 6 aña i e adishon 8%.
Adishon di desinvershon – Ora di enahenashon di un aktivo pa kua a risibí dedukshon di invershon, serka e ganashi di tantu e aña di enahenashon komo di e siguiente aña un adishon di desinvershon mester tuma lugá. E suma di e adishon ta konsistí di un porsentahe di e preis di traspaso, pero no mas haltu ku e preis di e invershon. E porsentahe aki ta dependé di e porsentahenan ku a apliká ora di e invershon (8 òf 12%). Ta papia di desinvershon, ora enahená e aktivo denter di 6 aña (pa edifisionan 15 aña) despues di komienso di e aña den kua e invershon a tuma lugá. Si bo a hasi invershonnan pa kua bo a claim dedukshon di invershon, e ora ei bo mester añadí serka bo relato anual un estado di kuenta di depresiashon (afschrijvingsstaat) riba kua ta spesifiká kada aktivo apart.
Enahenashon di un aktivo kier men benta di un aktivo.
Aktivonan ta bienes ku bo no ke bende mesora, pero ku bo ta usa durante un kantidat di aña den bo kompania. Pues nan ta diferente for di kompra i stòk. Bo mester di aktivo pa por traha bo produktonan òf duna bo servisio.
Ehèmpelnan di aktivonan ta:
- edifisio, mashin, outo, inventario i otro bienes duradero ku bo ta usa pa maneho di empresa (e aktivonan material)
- pèrmitnan i otro bienes no tangibel ku ta útil pa e empresa i di kua e uso ta hiba na un depresiashon (bahada di balor) di e pèrmitnan (e aktivonan inmaterial)