Djamars 15 di sèptèmber, riba Prinsjesdag, a manda e Proposishon di Lei Plan di Impuesto 2027 pa Tweede Kamer. Tweede Kamer i Eerste Kamer ainda mester aprobá e proposishon, despues di kua e medidanan ta drenta na vigor entrante promé di yanüari 2027.
Kiko e medidanan ta nifiká pa bo?
Akibou bo por mira e kambionan. Pa un bista general kompleto nos ta referí bo pa e dokumentonan di Prinsjesdag: Belastingplanstukken | Rijksoverheid.nl
Den e Plan di Impuesto 2027, gabinete ta proponé dos medida fiskal ku ta aplikabel na Boneiru, Sint Eustatius i Saba. E proposishonnan tin di haber ku kompensashon di kilometer i akseins riba kombustibel.
Medidanan:
Oumento kompensashon di kilometer liber di impuesto i regulashonnan relashoná
E sumanan máksimo pa gastu di outo, kompensashon di kilometer liber di impuesto, i sierto gastunan ekstraordinario lo subi di USD 0,20 pa USD 0,22 pa kilometer. Esaki tambe ta konta pa e kompensashon máksimo liber di impuesto ku dunadónan di trabou por paga kolaboradónan. E oumento ta konta ku forsa retroaktivo for di promé di yanüari 2026. Dunadónan di trabou no tin e obligashon pa paga e kompensashon mas haltu.
Bahada temporal akseins riba gasolin
Pa limitá e konsekuensianan di e preisnan mas haltu di kombustibel, ta proponé pa baha e akseins riba gasolin temporalmente na 2027:
- Boneiru: 5,5 sèn di dòler pa liter;
- Sint Eustatius i Saba: 4,19 sèn di dòler pa liter.
E bahada temporal ta konta di promé di yanüari te ku 31 di desèmber 2027.
E medidanan proponé ta parti di e Plan di Impuesto 2027 i ainda mester sigui pasa den e proseso di legislashon.