Medidanan Hulanda Karibense proposishon di lei plan di impuesto 2026
Djamars último, riba Prinsjesdag, a manda e proposishon di lei plan di impuesto 2026 pa Tweede Kamer. Ainda Tweede Kamer i Eerste Kamer mester akordá e proposishon aki, ku mas despues e medidanan lo drenta na vigor, entrante promé di yanüari 2026.
Kiko e medidanan aki ta nifiká p’abo?
Mas aki bou bo ta haña e kambionan mas importante. Pa un bista general total nos ta referí bo na e dokumentonan di Prinsjesdag: https://www.rijksoverheid.nl/onderwerpen/belastingplan/belastingplanstukken
Kambionan importante:
Forsa di kompra Hulanda Karibense
Un proposishon di gabinete ta pa entrante promé di yanüari 2026 adaptá e tarifanan di e promé i di dos eskala den e entradanan i loonbelasting na Boneiru, Sint Eustatius i Saba. Meta di e medida aki ta pa mehorá forsa di kompra i siguridat di bida di e klase ku entrada medio i esun abou. Kontrali di esaki, tin un oumento den e di dos eskala.
Gabinete ta proponé lo siguiente:
- Ta redusí e porsentahe den e promé eskala di 30.4% pa 29.4%,
- Ta oumentá e porsentahe den e di dos eskala di 35.4% pa 38.4%.
Oumento impuesto di biahe pa buelo largu for di Amsterdam
Entrante promé di yanüari 2027 gabinete ke adaptá e impuesto di biahe. Pa buelo di distansia largu for di Amsterdam, ku tin mas emishon di CO2, e impuesto di biahe ta subi.
Di 1 tarifa pa 3 tarifa
E impuesto di biahe na e momentu aki pa kada buelo di biahe ta igual, ku ta €29,40 pa pasahero. Gabinete ta proponé pa introdusí tres (3) tarifa:
- buelo di distansia kòrtiku € 29,40
- buelo di distansia medio € 47,24
- buelo di distansia largu € 70,86
Den 2027 ta koregí e tarifanan pa ku inflashon.
Pa buelo for di Amsterdam pa Aruba, Kòrsou, Sint Maarten, Boneiru, Saba i Sint Eustatius, e tarifa di impuesto pa buelo di distansia kòrtiku ta na vigor. Pues esaki no ta kambia pa e islanan.
Tarifa ta dependé di distansia di buelo for di Amsterdam
E tres (3) tarifanan ku gabinete ta proponé ta basá riba e distansia di buelo for di Amsterdam. Esun ku ta bula mas leu, i pues ta emití mas supstansia dañino, ta paga mas impuesto.
Buelo di distansia kòrtiku: buelo dentro di Union Oropeo i buelo te ku mas o ménos 2.000 kilometer for di Amsterdam.
2. buelo di distansia medio: buelo di 2.000 pa 5.500 kilometer. Por ehèmpel buelo pa destinashonnan manera Egipto i Turkia.
3. buelo di distansia largu: buelo mas di 5.500 kilometer for di Amsterdam. Por ehèmpel buelo pa Kánada, Méhiko, Indonesia i Suráfrika.
E destinashon final di e pasahero ta determiná e impuesto di biahe. Pa un buelo di Amsterdam pa Indonesia, ku un tránsito na por ehèmpel Istanbul òf Dubai, e tarifa mas haltu ta konta, pa motibu ku e destinashon final ta Indonesia.