Douane Caribisch Nederland a risibí muchanan di programa di ‘Buki di Pret’
Durante ‘Buki di Pret’, Douane Caribisch Nederland, ku hopi entusiasmo a duna tres presentashon interaktivo pa mucha entre 8 ku 12 aña. E muchanan a haña un bista úniko den e trabou di duana.
‘Buki di Pret’ ta un programa konosí i ku ta tuma lugá tur aña durante vakashon di skol, kaminda muchanan por partisipá den diferente aktividat plasentero.
E presentashon di duana tabata partí den un parti teorétiko i un parti práktiko. Diferente empleado di duana a konta tokante nan tarea i responsabilidatnan di tur dia, kaminda despues a sigui pa e parti di demonstrashon di ekipo i téknika ku nan ta usa den trabou.
E muchanan a reakshoná ku entusiasmo i a hasi pregunta skèrpi i interesá. Spesialmente e demonstrashonnan práktiko tabata interesante, kaminda e muchanan por a partisipá di forma aktivo.
Douane Caribisch Nederland ta mira bèk ku orguyo na e aktividat eksitoso aki. E tim a haña ku ta di balor pa inspirá e muchanan i hasi nan konsiente di e importansia di e trabou di duana den Hulanda Karibense.
