Duana CN ta interseptá droga i ta hasi dos detenshon na aeropuerto di Boneiru
Riba djabièrnè 29 di desèmber 2023, a kontrolá un pasahero maskulino prosedente di Hulanda ku un vuelo di TUI. Durante e kòntròl a topa ku dos (2) saku di plèstik ku un yerba paresido na probablemente narkótika. E sakunan tabata skondí den dos bleki di puiru pa feita di marka ‘Magic Shaving Cream’. A tèst kontenido di e sakunan i esaki a sali positivo pa probablemente Hasj. E sakunan tabatin un peso bruto di 200 gram.
A detené un hòmber di inisial G.A.G. pa violashon di Lei di Opio BES i a traspas’é pa KMAR pa investigashon mas aleu.
Riba djasabra 30 di desèmber 2023, Duana a kontrolá un pasahero femenino prosedente di Kòrsou ku un vuelo di Divi Divi.
Durante di e kòntròl di su ekipahe a topa ku un saku di plèstik ku un píldora paresido na XTC i tambe un saku di plèstik ku un supstansia kolo di lechi ku despues di tèst a Sali positivo pa Crystal Meth amfetamine.
A kontrolá e paña i kurpa di e pasahero femenino i tambe hasi un tèst di urina. Aki a resultá ku e tabatin un bolita (duwersbol) den su kurpa. E kontenido di esaki a tèst positivo pa kokaina.
A detené un dama di inisial R.M.R.R. pa violashon di Lei di Opio BES i traspas’é pa KMAR pa investigashon mas aleu.