Proposishon di Lei Plan Fiskal pa Boneiru, Sint Eustatius i Saba
Gabinete kier ahustá e sistema fiskal di Boneiru, Sint Eustatius i Saba, di manera ku e ta bira mas simpel i ta konektá mihó ku e sistema fiskal hulandes. Tambe gabinete kier repartí e gastunan mas igual. Tweede Kamer i Eerste Kamer mester aprobá e plannan ainda.
E Proposishon di Lei Plan Fiskal 2025 ta kontené medidanan importante pa siudadano i kompania na Boneiru, Sint Eustatius i Saba. Riba Prinsjesdag a manda e proposishon aki pa Tweede Kamer. Na momentu ku Tweede Kamer i Eerste Kamer aprobá e proposishon, e medidanan ta drenta na vigor entrante promé di yanüari 2025.
Kiko e medidanan ta nifiká pa bo?
Mas abou bo ta topa e kambionan mas importante pa siudadano i kompania. Pa un bista kompletu nos ta dirigí bo na e dokumentonan di Prinsjesdag.
https://www.rijksoverheid.nl/onderwerpen/belastingplan/belastingplanstukken
Kambionan importante pa siudadano:
No tin inkomstenbelasting riba suèldu mínimo
Un kambio importante pa siudadanonan ta ku ta stipulá den lei ku personanan ku ta gana suèldu mínimo, no mester paga inkomstenbelasting mas. Pa realisá esaki, ta mara e suma liber di impuesto na e suèldu mínimo legal na Hulanda Karibense.
Redukshon di e suma di entrada di e di dos grupo di ‘inkomstenbelasting‘
Gabinete ta proponé pa redusí entrante promé di yanüari 2025 e suma di entrada di e di dos grupo di belasting di USD 322.769 na USD 50.000. Ku esaki abitantenan ku gana minimo USD 70.728 den 2025 ta kai den e di dos grupo. Nan ta paga e ora ei un tarifa di impuesto mas haltu riba e entrada taksabel ku ta surpasá USD 70.728. Ku e proposishon akí gabinete kier repartí e ‘inkomstenbelasting’ mas hustu i kobra e entradanan mas haltu mas impuesto.
Kambionan importante pa empresario:
Tarifa di ‘vastgoedbelasting’ pa hotèl di 10% pa 11%
Gabinete ta proponé pa oumentá entrante promé di yanüari 2025 e tarifa di impuesto pa bien inmóbil ku hotèlnan ta hasi uzo di dje di 10% pa 11%. E oumentu akí ta motivá pa e echo ku sektor hotelero a rekuperá último añanan i ku e tarifa abou, ku ta na vigor for di 2013, no ta nesesario mas.
Tarifa di opbrengstbelasting i e asina yamá ‘aanmerkelijk belang’ di 5% pa 7,5%
Ademas ta proponé pa oumentá e tarifa pa ‘opbrengstbelasting’ i ‘aanmerkelijk belang’ di 5% na 7,5%. Esaki ta nifiká ku empresarionan ku un empresa privá (BV) lo paga mas impuesto riba nan ganashi. Ku e oumentu akí gabinete kier trese e tarifa di impuesto mas serka di e nivel hulandes i internashonal.
Ahustá anualmente e límite di e areglo pa empresario chikitu (KOR)
Un otro medida importante ta ku entrante 2026 ta ahustá anualmente e límite di e areglo pa empresario chikitu (‘Grens kleine ondernemersregeling’ - KOR) na e inflashon, di manera ku empresarionan chikitu por keda benefisiá di e areglo akí.
Identifikashon obligatorio pa empleado
Ademas gabinete ta proponé pa introdusí entrante promé di yanüari 2025 un obligashon di identifikashon pa empleado. Empresarionan e ora ei mester pidi un kopia di e dokumento di identifikashon di e empleado i warda e kopia den e atministrashon di suèldu. Ku esaki gabinete kier impedí ku empleadonan ta traha pretu i prevení ku dunadó di trabou i empleado pa e motibu akí no ta paga belasting.
Proseso di aprobashon
E plannan ta parti di e Plan Fiskal 2025 i ta trata esaki den e Proposishon di Lei Plan Fiskal islanan BES 2025. Ainda tin mester di aprobashon di Tweede i Eerste Kamer promé ku por implementá e medidanan akí. Ta spera votashon al respekto den novèmber i desèmber 2024.